ئەمرۆ چوار شەممە دوای 11 هەفتە داخران و ڕاگەیاندنی قەدەغەی هاتوچۆ لەشاری ووهانی چین کە ناوەندی بڵاوبونەوەی ڤایرۆسی کۆرۆنا بوو، قەدەغەی هاتوچۆ لە شارەکە هەڵگیراو ژیان بەرەو ئاسایی بونەوە دەڕوات.


لە ئێستادا دووکان و بازاڕەکانی شارەکە کراونەتەوە و هاوڵاتیان دەتوانن بڕۆنەوە سەر کارەکانیان.


لە دوای هەڵگیرانی قەدەغەی هاتووچۆ، شارەکە بە رووناکی ئێڵ ئیدی رووناککرایەوە، هاوکات شەقامەکان پڕبوون لە ئۆتۆمبێل و خەڵک لە ماڵەکانیان هاتنە دەرەوە، بەڵام هێشتا رێکارەکانی خۆپارێزی جێبەجێدەکەن و دەمامک و دەستکێش بەکاردەهێنن.

لەدوای نزیکەی یەک مانگ لە بڵابوونەوەی ڤایرۆسی کۆرۆنا لە مانگی دیسێمەبەری 2019 لە شاری ووهان، حکومەتی چین لە 23ی کانوونی دووەمی 2020 قەدەغەی هاتووچۆی لەم شارە راگەیاند و شارەکەی بە تەواوەتی داخست، ڤایرۆسەکەش، 81 هەزار و 802 کەسی لەو ولاتە توشکردو و لەو ژمارەیە سێ هەزار و 333 کەسیان مردن. ئێستا لە چین تەنیا هەزار و 190 کەس ڤایرۆسەکەیان ماوە، کە 189 کەسیان باری تەندروستییان ناجێگیرە.