هێڵەکانی ئینتەرنێت لە ئێران راگیرا

06:08 - 18/11/2019
جیهان

شورای ئەمنییەتی ئێران بڕیاریدا هێڵەکانی ئینتەرنێت رابگرێت و وەزیرێکیش رەخنە لە بڕیارەکە دەگرێت.

دوای سێ رۆژ لە خۆپیشاندانی هاوڵاتیان دژ بە گرانبوونی نرخی بەنزین، شورای ئەمنییەتی ئێران بڕیاریدا سەرجەم هێڵەکانی ئینتەرنێت لە وڵاتدا ببڕێت و وەزیری پەیوەندییەکانی حکومەتیش رەخنەی لە بڕیارەکە گرتووە.

محەمەد جەواد ئازەریجەهرومی وەزیری پەیوەندییەکانی ئێران بەهۆی کاریگەری خراپی بڕیارەکە لەسەر ئابوری وڵاتەکەی، رەخنەی لە بڕیارەکە گرتووە و هۆشداری داوەتە کاربەدەستانی وڵاتەکەی.

هەر بەهۆی پچڕانی هێڵەکانی ئینتەرنێتەوە مامەڵەی بانکە ئێرانییەکان لەگەڵ بەشێک لە بانکەکانی وڵاتەکانی دیکەدا پەکیان کەوتووە و پەیوەندییان پچڕاوە.

سەرەڕای دەرچوونی بڕیارەکە، تاکو ئێستا ڤیدیۆی خۆپیشاندانەکان لە تۆڕە کۆمەڵایەتییەکان بڵاودەکرێنەوە، چونکە پێدەچێت بۆچوونی جیاواز هەبێت لە ناو حکومەتدا سەبارەت بە بڕیارەکە.

دوای ئەوەی حکومەتی ئێران بڕیاریدا نرخی بەنزین بەرزبکاتەوە، لە هەینی رابرووەوە شەپۆلێکی ناڕەزایی و خۆپیشاندان سەرجەم ناوچەکانی ئێرانی گرتووەتەوە و لە ناوچە کوردییەکانیشدا خۆپیشاندانەکان بەردەوامییان هەیە، تاکو ئێستا ٣٤ هاوڵاتی خۆپیشاندەری کورد بەتەقەی راستەوخۆی هێزە ئەمنییەکانی ئێران گیانیان لەدەستداوە.

672 جار خوێندراوەتەوە