پەیامی سیستانی لەسەر خۆپیشاندانەکانی عێراق

01:53 - 04/10/2019
عێراق

مەرجەعی باڵای شیعەكان لە عێراق لەسەر خۆپیشاندانەکانی پاریزگاکانی عێراق یەکەم کاردانەوەی نیشاندا و ڕایگەیاند، لە دەرەوەی حکومەت چەند کەسێک ڕابسپێرێت بۆ بەدواداچوونی کێشەکان.

 

عەلی سیستانی، مەرجەعی باڵای شیعەكان لە عێراق لە ڕێگای نوێنەرەکەیەوە ڕایگەیاند "ئەگەر توندوتیژی دژی خۆپیشاندەران بەکاربهێندرێت کاردانەوەی خراپی لێدەکەوێتەوە و ئەم پرسە دەبێت هەر سێ سەرۆکایەتییەکەی عێراق بە جدی وەریبگرن".

سیستانی داوایکردووە ئەو لیژنەیەی لە دەرەوەی حکومەت پێکدەهێندرێت بەدواداچوونی جدی بکات بۆ چارەسەر و سەرهەڵدانی کێشەکانی ئەمدواییەی پارێزگاکان.

دوای سێ ڕۆژ لە خۆپیشاندان و کوژرانی نزیکەی ٤٠ کەس و برینداربوونی زیاتر لە هەزار کەس لە خۆپیشاندەر و هێزە ئەمنییەکان بەرپرسانی عێراق پەیامی خۆیان لەسەر خۆپیشاندانەکان بڵاوکردەوە و شەوی ڕابردووش عادل عەبدولمەهدی، سەرۆک وەزیرانی عێراق ڕایگەیاند، داواکاری خۆپیشاندان داواکاری ئەوانە و کاتیان دەوێت تا چارەسەری تەواوی کێشەکان.


3032 جار خوێندراوەتەوە