وانەیەکی نوێ بۆ قۆناغی بنەڕەتی زیاد دەکرێت

08:39 - 15/09/2019
کوردستان

 بۆ ساڵی نوێی خوێندنی 2019 -2020 ، پڕۆگرامی كارامەیی و بەها كۆمەڵایەتییەكان بە شێوەی ئەزموونی لە قوناغی بنەڕەتیدا دەخوێنرێت، بە مەبەستی خستنەبواری جێبەجێكردن و ئەگەر سەركەوتووش بوو، ساڵی داهاتوو بەفەرمی دەخرێتە پرۆگرامی خوێندنەوە و دەبێتە وانەیەكی گرنگ.


پڕۆگرامی كارامەیی و بەها كۆمەڵایەتییەكان نوێترین پڕۆگرامی گشتگیرە كە  وەزارەتی پەروەردە ئامادەی كردوە, بۆ جێگرەوەی پڕۆگرامی مافی مرۆڤ و مەدەنی لە خوێندنگا بنەڕەتییەكاندا، لە پارێزگای سلێمانی لە 58 خوێندنگە و لە پارێزگای هەڵەبجەش 5 خوێندنگا ئەزمون دەكرێت، بۆ ئەم مەبەستە لە هەر خوێندنگایەك 2 مامۆستا بەشداریی خولێك دەكات لەسەر چۆنێتیی وتنەوەی پڕۆگرامەكە.

 ئەمساڵ بە شێوەی ئەزموونی پڕۆگرامی كارامەیی و بەها كۆمەڵایەتییەكان لە ژمارەیەك خوێندنگای بنەڕەتی پارێزگاكانی هەرێمدا تاقی دەكرێتەوە، دوای هەڵسەنگاندن و سەرنج و تێبینییەكان، لە دوای سەركەوتنی ئەو ئەزموونە، ساڵی داهاتوو دەبێتە یەكێك لە وانە گرنگەكان بەڵام تاقیكردنەوەی تێدا ناكرێت. 

ژمارەیەك مامۆستای ئەم  پەیمانگایە, كە هەڵگری بڕوانامەی ماستەر و دكتۆران, چەند خولێكی مامۆستای سەركردەیانە بینیوە, بە مەبەستی وتنەوەی ڕێگای وانەوتنەوە و گەیاندنی زانیاریی زیاتر, ڕێكخراوی یونسكۆش سەرپەرشتیی پرۆسەكە دەكات.

ئەو مامۆستایانەی خولی سەركردەیان بینیوە و لە ئێستادا ڕاهێنان بە مامۆستایانی بنەڕەتی دەكەن، پڕۆگرامەكە بە گرنگ وەسف دەكەن و ئاماژە بایەخی ناوەڕۆك و پەیامی پرۆگرامەكە دەدەن.

یەكێك لەو مامۆستایانەی پسپۆڕییەكەی كۆمەڵایەتییە و فێرخوازی خولەكەیە , پڕۆگرامەكە بە پێویست دەزانێت بۆ گەشەپێدانی بەها كۆمەلایەتییەكان.

بە پێی زانیارییەكانی KNN جگە لە پڕۆگرامی كارامەیی و بەها كۆمەڵایەتییەكان، گۆڕانكاری لە پڕۆگرامی پەروەردەی ئیسلامی دەكرێت و ناوی وانەكە دەگۆڕێت بۆ مێژوی ئایینەكان و ناوەرۆكەكەشی گشتگیر و فراوان دەكرێت.

7489 جار خوێندراوەتەوە