قوربانیه‌كانی دوێنێی ده‌ریای ئیجه‌ زۆرینه‌یان خه‌ڵكی هه‌رێمن

04:11 - 11/10/2018
کوردستان

ژماره‌ی قوربانیانی ئەو بەلەمەی دوێنێ لە دەریای ئیجە ژێر ئاو کەوت، 28 كوردن و 15 كه‌سیان خه‌ڵكی زاخۆو دهۆكن ته‌نیا یه‌ك ژن رزگاری بووه‌.


ئاری جەلال سەرپەرشتیاری فیدراسیۆنی پەنابەران لە هەرێم بە KNNی راگەیاند: دوێنێ چوارشەممە بەلەمێكی كۆچبەران لە دەریای ئیجە لە توركیا كە 35 كۆچبەری تێدا بوە ژێر ئاو كەوتوە و تەنها یەك كەس رزگاری بووە.

وتیشی، بە پێی ئەو زانیاریانەی كە لە توركیاوە بە دەستیان گەشتوە تا ئێستا تەرمی 15 كەس لە خنكاوەكان دەرهێنراونەتەوە و زۆربەی سەرنشینانی بەلەمەكەش خەڵكی زاخۆ و دهۆكن.

سەرپەرشتیاری فیدراسیۆنی پەنابەران لە هەرێم  ئاماژەی بەوەشكرد، جگە لە كۆچبەرانی كورد ژمارەیەك لە كۆچبەری ئەفغانیش سەرنشینی بەلەمەكە بوون و ئەوانیش خنكاون و بێ سەرو شوێنن.

بەپێی ئەو زانیارییانەی دەست KNN کەوتووە، لە کۆی ئەو 35 کۆچبەرەی دوێنێ بەهۆی نوقمبوونی بەلەمێکی گواستنەوەی کۆچبەرانی نایاساییەوە بوونە قوربانی 28 کەسیان کوردن.

په‌یامنێری KNN له‌ زاخۆ رایگه‌یاند: ته‌نها له‌ دوو خێزانی خه‌ڵكی زاخۆ یه‌ك كه‌س رزگاری بووه‌ و 15 كه‌سیان خنكاون و زۆربه‌شیان منداڵن. 

 

هه‌ر به‌ پێی زانیارییه‌كانی KNN، ئه‌و ژنه‌ی رزگاری بووه‌ پێنج منداڵ و هاوسه‌ره‌كه‌ی خنكاون.

 

دوێنێ چوارشەممە، 10-10-2018 وەزارەتی ناوخۆی تورکیا بڵاوی کردەوە، بەلەمێک، کە کۆچبەری نایاسایی هەڵگرتبوو لە کەناراوەکانی ئیزمیر نوقم بووەو بەهۆیەوە نۆ کەس گیانیان لەدەستداوە و 26 کەسیش بێسەرو شوێن بوون.

12063 جار خوێندراوەتەوە