بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان بڵاویکردەوە؛ دوای نیوەڕۆی ئەمڕۆ پێنجشەممە شەپۆلێکی بارانبارین لە سنووری پارێزگای دهۆکەوە دەستپێدەکات و دواتر ناوچەکانی سۆران، ڕاپەڕین و بەشێک لە پارێزگای سلێمانی دەگرێتەوە. هەروەها ئەگەری نمەبارانێکی کەم لە هەولێر و دەوروبەری هەیە و لە شەودا کاریگەریی شەپۆلەکە لاواز دەبێت.

بۆ سبەینێ هەینی، جارێکی دیکە بارانبارین لە دهۆک و زاخۆوە دەستپێدەکاتەوە و کاریگەرییەکەی درێژدەبێتەوە بۆ سۆران، ڕاپەڕین، سلێمانی و هەڵەبجە. لە ناوچەکانی باکووری هەرێمیش ئەگەری تاوەباران و هەورەبرووسکە هەیە، بەڵام لە ناوچەکانی ناوەڕاست و باشوور ئەگەری بارانبارین کەمتر دەبێت و پلەکانی گەرماش جێگیر دەبن.

کەشناسیی هەرێم ئاماژەی بەوەش کردووە، گۆڕانکاری لە شێوازی داباریندا دروستبووە و بەراورد بە سەرەتای شەپۆلەکە، کاریگەرییەکەی کەمتر بووەتەوە، بۆیە مەرج نییە بارانبارین سەرجەم ناوچەکان بە یەک ئاست بگرێتەوە.