یەکێتیی زانایانی ئایینی ئیسلامیی کوردستان سەبارەت بە بڵاوبوونەوەی هەواڵی دەستگیرکردنی کەسێک لە شاری کەلار بە تۆمەتی هەبوونی "وێنەی نەشیاو" لە مۆبایلەکەیدا، روونکردنەوەیەکی بڵاوکردەوە و رەتیکردەوە ئەو کەسە مامۆستای ئایینی بێت.

لە راگەیەندراوەکەدا هاتووە، ئەو کەسە هیچ پەیوەندییەکی بە پیشەی مەلایەتییەوە نییە، نە ئەندامی یەکێتیی زانایانە و نە فەرمانبەری وەزارەتی ئەوقافە، بەڵکو سێ ساڵ پێش ئێستا تەنیا بۆ ماوەیەکی کەم وەک خۆبەخش پێشنوێژی کردووە و دواتر دوورخراوەتەوە.

یەکێتیی زانایان نیگەرانیی زۆری خۆی بەرامبەر بەشێک لە دەزگاکانی راگەیاندن و تۆڕە کۆمەڵایەتییەکان دەردەبڕێت کە ناوی مەلایەتییان زڕاندووە و هێرشیان کردووەتە سەر مامۆستایانی ئایینی، هاوکات داواکارە رێکاری توند بەرامبەر ئەو کەسانە بگیرێتەبەر کە بەبێ مۆڵەتی فەرمی مزگەوتەکان بەکاردەهێنن.