شەپۆلێکی ناجێگیریی کەشوهەوا ناوچەکانی هەرێمی کوردستان و عێراق دەگرێتەوە و پێشبینی دەکرێت لە چەند ڕۆژی داهاتوودا بارانبارین و هەورەبروسکە لە کات و شوێنی جیاوازدا بەردەوام بێت.

بەپێی پێشبینییەکانی دەستەی کەشناسیی عێراق و شارەزایانی کەشناسی، سبەینێ پێنجشەممە (29ی تشرینی یەکەمی 2026) ئاسمانی هەرێمی کوردستان زۆربەی کات نیمچەهەور دەبێت و تاوەباران و هەورەبروسکە ڕوودەدات. هاوکات، خێرایی با چالاک دەبێت و پلەکانی گەرما جێگیر دەبن؛ بە جۆرێک لە سلێمانی و دهۆک (25) پلە و لە هەولێر (26) پلەی سیلیزی دەبێت.

لەسەر ئاستی عێراقیش، کاریگەریی ئەم شەپۆلە تاوەکو ڕۆژی یەکشەممەی داهاتوو دەمێنێتەوە. لە ناوچەکانی ناوەڕاست و باشوور بارانی مامناوەند دەبارێت، لە هەندێک ناوچەشدا بەهۆی چالاکبوونی باوە تۆز و خۆڵ بەرز دەبێتەوە و پلەکانی گەرما ڕوو لە نزمبوونەوە دەکەن.