بەڕێوەبەرایەتیی نەوت و کانزاکانی هەولێر ئاگادارییەکی سەبارەت بە ونبوونی کارتی ئەلیکترۆنیی سووتەمەنی بڵاوکردەوە و داوا لە هاووڵاتییان دەکات لە کاتی ونبوونی کارتەکانیان ڕاستەوخۆ سەردانیان بکەن. ئەمەش بە مەبەستی ڕاگرتنی کارتەکە و ڕێگریکردنە لە بەکارهێنانی لەلایەن کەسانی دیکەوە.

بۆ دەرهێنانەوەی کارتی نوێ وەک جێگرەوە، پێویستە کەسی یەکەم و خاوەنی کارتەکە (سەرۆکی خێزان) خۆی لە بەڕێوەبەرایەتییەکە ئامادە بێت. هەروەها دەبێت کارتی نیشتمانیی ئەسڵی، فۆرمی ئەلیکترۆنی، فۆرمی خۆراکی کۆن و نووسراوی بەشی ونبووەکانی پۆلیس (مەفقودات) لەگەڵ خۆیدا ببات.

بەپێی ڕێکارەکانی بەڕێوەبەرایەتییەکە، دوای ئەنجامدانی سەردانەکە و جێبەجێکردنی مامەڵەکە، لە ماوەی یەک مانگدا کارتێکی نوێی سووتەمەنی بۆ هاووڵاتییەکە دروست دەکرێتەوە.