شاهین فوئاد- هەولێر
بەرزبوونەوەی بەرچاوی نرخی دۆلار بەرامبەر بە دینار، نیگەرانی ئەوەی دروستکردووە، کە نرخی کاڵا و خۆراکیش لە بازاڕ بەرزببیتەوە، لەوبارەوە بەڕێوەبەری گشتیی بازرگانی لە وەزارەتی بازرگانی هەرێم دڵنیایی دەداتە هاووڵاتیان، کە بەشی شەش مانگ خۆراک لە کۆگاکاندا هەیە و لە رێگەی لیژنەکانیشیانەوە چاودێری بازاڕدەکەن، بۆ ئەوەی نرخەکان بەرزنەبنەوە.
نەوزاد شێخ کامیل بەڕێوەبەری گشتیی بازرگانی لە وەزارەتی بازرگانی بە کەی ئێن ئێنی راگەیاند: بە گشتی لەو وڵاتانەی کە پشتیان بە هاوردەکردن بەستووە، بەرزبوونەوەی نرخی دۆلار کاریگەری لەسەر نرخی کاڵا و خۆراک دەبێت، بەڵام وەک وەزارەتەکەیان لیژنەکانیان راسپاردووە بۆ ئەوەی لەبازاڕدا ئامادەیی بەردەوامیان هەبێت و بەدواداچوون بۆ ئەو کاڵایانە بکەن کە نرخەکانیان زیاد لە پێویست بەرزبووەتەوە و رێگە بەوە نەدەن و رێکاری پێویست بگرنەبەر.
وتیشی: لیژنەکانی قائیمقامیەت و ئاسایشی ئابوریش چاودێری بازاڕدەکەن و پێکەوە هەوڵ دەدەین سەقامگیری و جێگیرییەک بۆ بازاڕ بگێڕینەوە.
سەبارەت بە خۆراکیش وتی: بەشی شەش مانگ خۆراک لە کۆگاکانی کەرتی تایبەتدایە و وەک وەزارەتی بازرگانیش لە هەفتەی داهاتووەوە دەست بە دابەشکردنی سەبەتەی شەشەمی بەشە خۆراک دەکەن و هەموو ئەمانە هۆکارن بۆ ئەوەی نەهێڵین نرخی کاڵا و بەتایبەتی خۆراک زیاد لە پێویست بەرزببەوە.
نەوزاد شێخ کامیل ئاماژەی بەوەشکرد، ئەگەر بڕێکی زۆر دۆلار بخرێتە بازارەوە، سەقامگیری بۆ بازاڕ دەگەڕێتەوە و نرخەکان دادەبەزنەوە.