ڕێبەر ئەحمەد، وەزیری ناوخۆی هەرێمی کوردستان و فەریق ڕوکن زەید حۆشی موسەوی، سەرۆکی دەزگای دژەتیرۆری عێراق کۆبوونەوە و جەختیان لە بەردەوامیی هەماهەنگی و یەکخستنی هەوڵەکان بۆ ڕووبەڕووبوونەوەی ئاڵەنگارییە ئەمنییەکان کردەوە.

بەپێی ڕاگەیەندراوێکی دەزگای دژەتیرۆری عێراق، کە ئەمڕۆ پێنجشەممە بڵاویکردووەتەوە، لە کۆبوونەوەکەدا تاوتوێی چەند دۆسیەیەکی ئەمنیی لەپێشینە لە نێوان ناوەند و هەرێم کراوە، لە سەروو هەموویانەوە؛ پەرەپێدانی میکانیزمەکانی هەماهەنگی، ئاڵوگۆڕی زانیاری و شارەزایی و بەهێزکردنی ئاستی تەواوکاری لە نێوان دامەزراوە ئەمنییەکاندا بۆ ڕووبەڕووبوونەوەی مەترسییەکانی تیرۆر.

لە بەشێکی دیکەی ڕاگەیەندراوەکەدا هاتووە، هەردوولا باسیان لە گرنگیی بەدواداچوون و ڕاوەدوونانی پاشماوەکانی چەتە تیرۆریستییەکان و وشککردنی سەرچاوەکانی پشتگیرییان کردووە. هاوکات جەختیان کردووەتەوە لەسەر پێویستیی بەردەوامیی هاوکارییەکان بە جۆرێک کە توانای دەزگا ئەمنییەکان زیاتر بکات بۆ وەڵامدانەوەی ئاڵەنگارییەکان و چەسپاندنی ئاسایش و سەقامگیری لە سەرانسەری وڵاتدا.