وەزیری دەرەوەی تورکیا ڕایگەیاند، هاوپەیمانییەکەیان لەگەڵ سعودیە و پاکستان هەنگاوێکی مێژووییە و تەواوکەری هاوپەیمانیی باکووری ئەتڵەسی (ناتۆ)یە و دژی هیچ وڵاتێک نییە و دەرگاشیان بۆ بەئەندامبوونی وڵاتانی دیکە کراوەیەوە.

هاکان فیدان وەزیری دەرەوەی تورکیا ئاشکرای کرد کە کۆبوونەوەکانیان لەگەڵ پاکستان و سعوودیە لەسەر ئاستی وەزیرانی دەرەوە، وەزیرانی بەرگری و سوپاسالارانی ئەو وڵاتانە بەڕێوەچووە. جەختیشی لەوە کردەوە کە ئەم هاوپەیمانییە پشت بە یاسا نێودەوڵەتییەکان دەبەستێت، ئامانجی جێگیرکردنی ئاشتییە و دژی هیچ وڵاتێکی دیاریکراو ئاراستە نەکراوە.

سەبارەت بە فراوانکردنی هاوپەیمانییەکە، وەزیری دەرەوەی تورکیا ڕوونیکردەوە کە دەرگایان کراوەیە بۆ هەموو وڵاتانی دۆست و لە ئێستادا کار بۆ داڕشتنی نەخشەڕێگایەک دەکەن بۆ ئەوەی وڵاتانی دیکەش بێنە ناو هاوپەیمانییەکەوە.

هێمای بۆ ئەوەش کرد کە بەم هەنگاوە پرۆسەی دروستکردنی پێکهاتەیەکی نوێ بۆ ئاسایش و هاوکاری لە ناوچەکەدا دەستی پێکردووە و پێویستە وڵاتانی ناوچەکە پێکەوە کار بکەن بۆ دەستەبەرکردنی ئاشتی و سەقامگیری.