نوێنەرانی مامۆستایانی گرێبەست ئاشکرایان کرد، وەزارەتی دارایی هەرێم تەواوی ناو و داتاکانیانی خستووەتە ناو پڕۆژەیاسای بودجەی ساڵی 2027ـی عێراقەوە و هەر ئەمڕۆش بەمەبەستی دروستکردنی پاڵپشتی بۆ پەسەندکردنی، بەرەو بەغدا بەڕێدەکەون.

لە ڕاگەیەندراوێکدا، نوێنەرانی مامۆستایانی گرێبەست ڕایانگەیاند: ئەمڕۆ لە وەزارەتی دارایی هەرێم لەگەڵ بەڕێوەبەری گشتیی بودجە و ستافی ئامادەکاری پڕۆژەی دارایی هەرێم بۆ بودجەی عێراق کۆبوونەتەوە. ئامانج لە کۆبوونەوەکە دڵنیابوونەوە بووە لە خستنەناوەوەی ناو و داتای تەواوی مامۆستایانی گرێبەست بۆ ناو پڕۆژەیاسای بودجەی 2027، کە بڕیارە لە ناوەڕاستی مانگی 10ـی ئەمساڵدا ڕەوانەی پەرلەمانی عێراق بکرێت.

ئاماژە بەوەش کراوە، وەزارەتی دارایی هەرێم تەرخانی دارایی و ناوی تەواوی مامۆستایانی گرێبەستی بەمەبەستی داواکردنی پارە لە بەغدا ئامادە کردووە. هاوکات داواکاری بۆ دابینکردنی پێداویستییە ماددییەکان، پارەی بڕوانامە، پاداشت و قەرەبووی ساڵانی ڕابردووی دانەمەزراندن لە هەرێمی کوردستان، لەپاڵ چین و توێژەکانی دیکەی بێبەش لە مافی دامەزراندن، خراوەتە ناو پڕۆژەکەوە.

لە کۆتایی ڕاگەیەندراوەکەدا هاتووە، دوای دڵنیابوونەوەیان لە بوون و جێگیرکردنی ناوەکانیان لەناو پڕۆژە ئامادەکراوەکەدا، نوێنەرانی مامۆستایانی گرێبەست هەر ئەمڕۆ بەرەو بەغدا بەڕێدەکەون. ئامانجی سەردانەکەیان پشتیوانیکردنە لە داواکارییەکەی وەزارەتی دارایی هەرێم و دروستکردنی پاڵپشتیی زیاتر لەلایەن پەرلەمانتاران، لیژنەی دارایی و لایەنە پەیوەندیدارەکانی عێراقەوە.