بنیامین نەتانیاهۆ، سەرۆک وەزیرانی ئیسرائیل ڕایگەیاند، ڕووبەڕووبوونەوەیان لەگەڵ کۆماری ئیسلامیی ئێران و هێزە نزیکەکانیان بەردەوامە و ئایندەی ئیسرائیلیش بەتەواوی پەیوەستە بە ئاستی هێز و تواناکانیانەوە.

نەتانیاهۆ لە میانی دیدارێکدا لەگەڵ بەشداربووانی خولێکی ئەفسەرانی یەدەگی جەنگی لە ناوچەی (گوش عەتسیۆن) وتی: "لە ئێستادا ڕووبەڕووی کۆماری ئیسلامی و هێزە نزیکەکانیان بووینەتەوە، گورزمان لێ وەشاندوون و هێشتا ئەم پرسە کۆتایی نەهاتووە، بەڵکو پەیوەستە بە هێز و تواناکانمانەوە."

ئاماژەی بەوەشکرد، پێگەی ئیسرائیل لە دەیەکانی داهاتوودا پەیوەستە بە توانا و هێزی وڵاتەکەیەوە، لەبەر ئەو هۆکارەش حکومەتەکەی لە هەوڵی بەهێزکردنی تواناکانیدایە. وتیشی: "ئەوەی کە 30 ساڵی دیکە لە چ پێگەیەکدا دەبین، پەیوەستە بە هێزەکەمانەوە، بۆیە ئەوەی ئێستا دەیکەین، بنیادنانی هێزێکی زیاترە."

لە بەشێکی دیکەی قسەکانیدا، سەرۆک وەزیرانی ئیسرائیل جەختی لەسەر پێویستیی گەیشتن بە سەربەخۆیی چەکداری کردەوە و ڕایگەیاند: "زۆر بەرز دەنرخێنم ئەو پشتیوانییەی لە دۆستە ئەمریکییەکانمانەوە پێمان گەیشتووە، بەڵام دەبێت خۆمان لەو پشتبەستنە ڕزگار بکەین و سیستەمێکی بەرگریی و چەکداریی سەربەخۆ بۆ خۆمان بنیاد بنێین."