میدیاکانی ئیسرائیل بڵاویانکردەوە، پێشبینی دەکرێت ئاڵوگۆڕی هێرشەکان لەگەڵ ئێران بۆ چەند ڕۆژێک بەردەوام بێت و سوپای ئیسرائیلیش ئامادەکاری دەکات بۆ بانگهێشتکردنێکی بەرفراوانی هێزە یەدەگەکانی و فراوانبوونی بازنەی ڕووبەڕووبوونەوە سەربازییەکان.

بەپێی زانیارییەکانی ڕادیۆی سوپای ئیسرائیل و کەناڵی 12ی ئەو وڵاتە، پێشبینی دەکرێت قەبارەی هێزە سەربازییەکان لەسەر سنوورەکان، بەتایبەت لەگەڵ کەناری ڕۆژئاوا و ئوردن زیاد بکرێت. هاوکات، ئامادەکاری تەواو کراوە بۆ چەندین ڕۆژ لە شەڕ و پێکدادان، لەگەڵ هەبوونی پێشبینییەکان بۆ فراوانبوونی زیاتری ڕووبەڕووبوونەوە سەربازییەکان.

لەلایەکی دیکەوە، پێگەی 'والا'ی ئیسرائیلی ئاشکرایکردووە، چەند پێشنیارێک خراونەتە ڕوو بۆ ئەوەی ئەگەر تاران هێرشەکانی چڕتر بکاتەوە، ڕاستەوخۆ ژێرخانی ئێران بکرێتە ئامانج.