بەڕێوەبەرایەتیی پۆلیسی پارێزگای هەولێر ڕوونکردنەوەیەک لەسەر گیانلەدەستدانی تۆمەتبارێک لەناو گرتووخانەدا بڵاودەکاتەوە و ڕایدەگەیەنێت، تۆمەتبارەکە کە پێشمەرگەیە کۆتایی بە ژیانی خۆی هێناوە و پزیشکی دادوەریش ڕووداوەکە پشتڕاست دەکاتەوە.

بەپێی ڕاگەیەندراوێکی بەڕێوەبەرایەتییەکە، تۆمەتبار (ئاسۆ مەجید قادر)، لەدایکبووی ساڵی 1977 و پێشمەرگە لە یەکەی پاسەوانیی سەر بە هێزەکانی زێرەڤانی، پێشتر بەپێی ماددەی یەک لە یاسای ژمارە 21ی ساڵی 2003 فەرمانی دەستگیرکردنی بۆ دەرچووە و لە ڕێکەوتی 2ی نیسانی 2026 لەلایەن تیمەکانی پۆلیسەوە دەستگیرکراوە.

پۆلیسی هەولێر ئاماژە بەوە دەکات کە تۆمەتبارەکە لە ڕێکەوتی 5ی حوزەیرانی 2026، کاتژمێر 12:20ی نیوەڕۆ، لەناو گرتووخانەدا کۆتایی بە ژیانی خۆی هێناوە.

لە بەشێکی دیکەی ڕوونکردنەوەکەدا هاتووە، تیمی نەهێشتنی بەڵگە و تاوان و بەشی پۆلیسی نەهێشتنی تاوان لە بەڕێوەبەرایەتیی پۆلیسی هەولێر، هاوکات لەگەڵ ڕاپۆرتی پزیشکی دادوەری، بە پشتبەستن بە بەڵگەی سەلمێنراو پشتڕاستی دەکەنەوە کە ناوبراو بە دەستی خۆی کۆتایی بە ژیانی هێناوە.