فەرماندەیی ناوەندیی هێزەکانی ئەمریکا (سێنتکۆم) ڕایگەیاند، سەرجەم ئەو هێرشە مووشەکی و درۆنییانەی سوپای پاسدارانی ئێران کرابوونە سەر هێزەکانیان لە ناوچەکە شکستیان هێناوە. هاوکات سەرجەم ئەو بانگەشانەشی ڕەتکردەوە کە باس لە پێکان و زیانگەیاندن بە بارەگای سەرەکیی هێزی پێنجەمی دەریایی ئەمریکا لە بەحرێن و بنکەیەکی ئاسمانیی دیکە لە کوێت دەکەن.

سێنتکۆم لە ڕوونکردنەوەیەکدا ئاشکرایکرد، سێ مووشەکی بالیستی کە ئاڕاستەی بارەگای هێزی پێنجەم لە بەحرێن کرابوون، دەستبەجێ لەلایەن سیستمەکانی بەرگریی ئاسمانیی ئەمریکا و بەحرێنەوە تێکشکێنراون. هەروەها دوو مووشەکی دیکەش کە ئاڕاستەی کوێت کرابوون، پێش گەیشتنیان بە ئامانجەکە خواربوونەتەوە یان لە ئاسماندا پارچەبوون.

فەرماندەییەکە جەختی لەوە کردەوە کە هێرشەکان هیچ زیانێکی گیانییان بەدواوە نەبووە و بانگەشەکانی ئێرانی لەو بارەیەوە بە "درۆ و زانیاریی هەڵە" وەسف کرد.

راشیگەیاندووە: وەک پەرچەکردارێک و لە چوارچێوەی "بەرگری لەخۆکردن"، هێزەکانی ئەمریکا هێرشیان کردە سەر بنکەیەکی کۆنترۆڵکردنی فڕۆکەی بێفڕۆکەوان (درۆن) و ڕاداری سوپای پاسداران لە دوورگەی قشم لە گەرووی هورمز و ئامانجەکەیان پێکا.

پێشتر، میدیا فەرمییەکانی ئێران بڵاویانکردەوە کە کاتژمێر 4:50ی بەرەبەیانی ئەمڕۆ، سوپای پاسداران هێرشی مووشەکی و درۆنی کردووەتە سەر بنکەکانی ئەمریکا لە بەحرێن و کوێت، ئەمەش وەک تۆڵەسەندنەوەیەک لە بەرامبەر هێرشێکی پێشتری ئەمریکا بۆ سەر کەشتییەکی نەوتهەڵگری ئێرانی و تاوەرێکی پەیوەندییەکان لە ناوخۆی ئێراندا.

ئەم پێکدادانە سەربازییە ڕاستەوخۆیانە لە کاتێکدایە کە گفتوگۆکانی تایبەت بە ئاگربەست لە نێوان واشنتن و تاران لە وڵاتی قەتەر گەیشتوونەتە بنبەست، بەهۆی پەرەسەندنی گرژییەکانیشەوە، سوپای هەردوو وڵاتی کوێت و بەحرێن دۆخی ئامادەباشیی تەواویان لە وڵاتەکانیاندا ڕاگەیاندووە.