پێشبینییەکانی کەشوهەوا بۆ 48 کاتژمێری داهاتوو ئاشکرا کران و بەپێی زانیارییەکان، ئاسمان بەگشتی ساماڵ و پەڵەهەور دەبێت، لەگەڵ بەرزبوونەوەی کەمێکی پلەکانی گەرما لە سەرجەم ناوچەکانی هەرێمی کوردستان.

بۆ ئەمڕۆ یەکشەممە، ئاسمان ساماڵ و پەڵەهەور دەبێت، بەڵام لە ناوچە شاخاوییەکان بۆ نیمچەهەور دەگۆڕێت. خێرایی با لەسەرخۆ دەبێت کە لە کاتژمێرێکدا لە نێوان 10 بۆ 15 کیلۆمەتردایە، بەڵام لە دوانیوەڕۆدا لە سنووری پارێزگاکانی سلێمانی و هەڵەبجە خێراییەکەی بۆ سەروو 20 تا 30 کیلۆمەتر لە کاتژمێرێکدا زیاد دەکات. هاوکات مەودای بینین لە نێوان 8 بۆ 10 کیلۆمەتردا دەبێت و پلەکانی گەرماش بەراورد بە ڕۆژانی پێشوو کەمێک بەرز دەبنەوە.

سەبارەت بە کەشوهەوای سبەینێ دووشەممە، پێشبینی دەکرێت هاوشێوەی ئەمڕۆ ئاسمان ساماڵ و پەڵەهەور بێت و لە ناوچە شاخاوییەکان نیمچەهەور بێت. ئاراستەی با دەگۆڕێت بۆ باکووری ڕۆژهەڵات و خێراییەکەشی لەسەرخۆ دەبێت. پلەکانی گەرماش بەراورد بە ئەمڕۆ یەکشەممە بەرزبوونەوەی زیاتر بەخۆیانەوە دەبینن.

بەپێی پێشبینییەکان، بەرزترین پلەکانی گەرمای سبەینێ دووشەممە لە شارەکانی هەرێمی کوردستان بەم شێوەیە دەبن: لە هەولێر 32 پلە، لە سلێمانی 30 پلە، لە دهۆک 31 پلە، لە هەڵەبجە 33 پلە، لە کاتێکدا لە گەرمیان بەرزترین دەبێت کە دەگاتە 37 پلە و لە حاجی ئۆمەرانیش نزمترین دەبێت بە 22 پلەی سیلیزی.