ئاستی ئاوی بەنداوی دوکان بەردەوامە لە بەرزبوونەوە و گەیشتووەتە ئاستێکی پێوانەیی، بەپێی نوێترین ئامارەکان تەنها 48 سانتیمەتر ماوە بۆ ئەوەی ئاوی بەنداوەکە بەتەواوی پڕببێت و سەرڕێژ بکات.

بەپێی داتاکان، لە ئێستادا کۆی قەبارەی ئاوی گلدراوە لە بەنداوەکەدا گەیشتووەتە 6 ملیار و 800 ملیۆن و 642 هەزار مەتر سێجا. هەروەها ئاستی ئاوەکە بەرزبووەتەوە بۆ 510 مەتر و 52 سانتیمەتر.

بەمەش بەنداوەکە زۆر نزیکبووەتەوە لە پڕبوونی تەواوەتی، و چاوەڕوان دەکرێت لە ئەگەری بەردەوامبوونی هاتنی لێشاوی ئاو بۆ ناو بەنداوەکە، لە ماوەیەکی زۆر نزیکدا سەرڕێژ بکات.

بەو پێیەی لەئێستادا رۆژانە 5 سم ئاوی بەنداوەکە زیاد دەکات، ئەگەر ئەو بڕە کەم نەکات، نزیکەی 10 رۆژی دیکە ئەگەری هەیە بەنداوی دوکان سەرڕێژ بکات.