ئەمڕۆ شەممە (23ی ئایاری 2026)، عەلی فالح زەیدی، سەرۆک وەزیرانی عێراق، سەردانی وەزارەتی دارایی کرد و لەگەڵ وەزیر و بەرپرسانی باڵای وەزارەتەکەدا کۆبووەوە، بە مەبەستی دانانی دیدگایەکی دارایی تۆکمە کە وەڵامدەرەوەی ئاڵەنگارییەکان بێت.

لە کۆبوونەوەکەدا، سەرۆک وەزیران ئاماژەی بەوە کرد کە عێراق بە دۆخێکی هەستیاری دارایی و ئابووریدا تێدەپەڕێت بەهۆی پێشهاتە هەرێمی و نێودەوڵەتییەکانەوە، کە کاریگەرییان لەسەر توانای هەناردەکردن و داهاتی نەوتیی عێراق داناوە. ناوبراو جەختی لەوە کردەوە کە ٩٠٪ی بودجەی وڵات پشت بە نەوت دەبەستێت، بۆیە پێویستە کار بۆ فرەچەشنکردنی سەرچاوەکانی داهات و گەشەپێدانی ئابووریی نانەوتی بکرێت، هاوکات داوای کرد کە دەبێت ڕاستگۆیانە و بەبێ هیچ زیادەڕەوییەک هاووڵاتییان لە ئاڵەنگارییە داراییەکان ئاگادار بکرێنەوە.

لە بەشێکی دیکەی ڕێنماییەکانیدا، زەیدی فەرمانی دا بە دابەشکردنی مووچەی فەرمانبەران و تۆڕی چاودێریی کۆمەڵایەتی لە کاتی خۆیدا بۆ ڕێگریکردن لە دروستبوونی دڵەڕاوکێ. هەروەها داوای ئامادەکردنی شایستە داراییەکانی جوتیاران و بەڵێندەرانی کرد. سەبارەت بە گومرگەکانیش، فەرمانی دا بە پێداچوونەوە بە داهاتی شەش مانگی ڕابردوو و بەئەلیکترۆنیکردنی سیستەمەکە بۆ ڕێگریکردن لە گەندەڵی. لە بڕیارێکی سەرنجڕاکێشیشدا، سەرۆک وەزیران هەڵواسینی وێنەی خۆی و وەزیرەکانی لە دامودەزگاکاندا قەدەغە کرد.