عەلی ئەکبەر ویلایەتی، ڕاوێژکاری کاروباری نێودەوڵەتیی ڕێبەری کۆماری ئیسلامیی ئێران، لە یاداشتێکی 23 خاڵیدا ڕەخنەی توند لە هەرێمی کوردستان دەگرێت و تۆمەتباری دەکات بە نزیکبوونەوە لە ئیسرائیل و پاڵپشتیکردنی پارتە کوردییەکانی دژبەری تاران.

ویلایەتی کە وەزیری پێشووتری دەرەوەی ئێران بووە و خۆی وەک ئەمینداری گشتیی "کۆمەڵەی جیهانیی رابوونی ئیسلامی" ناساندووە، لە یاداشتەکەیدا داوا لە حکومەتی ناوەندیی عێراق دەکات چارەنووس و سەروەریی هەرێمی کوردستان "یەکلایی" بکاتەوە و دەپرسێت: "بۆچی هەرێمی کوردستان کە دەبێت هەرێمێک بێت لەژێر حوکمڕانیی ناوەندیدا، بە کرداری سیاسەتی دەرەوەی سەربەخۆی هەیە و جیاواز لە بەغدا کار دەکات؟" هەروەها بانگەشەی ئەوەی کردووە کە "بەڵگە و وێنەی کۆبوونەوەی بەرپرسانی هەرێم و ئیسرائیل لە هەولێر هەیە".

لە بەشێکی دیکەی قسەکانیدا، ناوبراو ئاماژەی بەوە کردووە کە هەرێمی کوردستان بووەتە پێگەیەک بۆ پارتەکانی وەک (کۆمەڵە، حزبی دیموکراتی کوردستانی ئێران و موجاهیدینی خەڵق) بۆ گواستنەوەی هێزەکانیان بۆ ناوخۆی ئێران و پیلانگێڕان، کە بە وتەی ئەو، ئەمەش پەیوەندی بە خۆپیشاندانەکانی سەرەتای ئەمساڵەوە هەیە.

ئەم لێدوانانە لە کاتێکدان کە تا ئێستا هیچ کاردانەوەیەکی فەرمی لەلایەن هەولێر یان پارتە کوردییەکانەوە نەدراوە.

سەرباری ئەم تۆمەتانەش، پەیوەندییە ئابووری و بازرگانییەکانی نێوان هەولێر و تاران لە ئاستێکی باشدان و بەرپرسانی هەرێمیش بەردەوام جەختیان کردووەتەوە کە ڕێگە نادەن خاکی هەرێم ببێتە هەڕەشە بۆ سەر ئێران، بەتایبەت کە سنوورە هاوبەشەکانیان ڕۆڵێکی ژیانی و گرنگ لە ئابووریی ئێراندا دەگێڕن لەم بارودۆخە ئاڵۆزەی ئێستای ناوچەکەدا.