بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، پێشبینییەکانی کەشوهەوای بۆ 48 کاتژمێری داهاتوو بڵاوکردەوە و تێیدا ئاماژەی بە بەرزبوونەوەی پلەکانی گەرما و گۆڕانکارییەکانی کەشوهەوا کردووە.

بەپێی پێشبینییەکان، ئەمڕۆ شەممە (23ی ئایار)، ئاسمان بەگشتی ساماڵ دەبێت لەگەڵ پەیدابوونی هەندێک پەڵەهەور. پلەکانی گەرما بەراورد بە دوێنێ 2 بۆ 4 پلە بەرزدەبنەوە و خێرایی با لەسەرخۆ دەبێت. لە گەرمیان بەرزترین پلەی گەرما پێشبینی کراوە کە 32 پلەیە و لە حاجی ئۆمەرانیش نزمترین دەبێت کە 18 پلەی سیلیزییە.

سەبارەت بە سبەینێ یەکشەممە (24ی ئایار)، گۆڕانکاری بەسەر کەشوهەوادا دێت؛ لە ناوچە شاخاوییەکان ئاسمان دەگۆڕێت بۆ نیمچە هەور و ئەگەری بارینی تاوەبارانی کورتخایەن هەیە، بەتایبەت لە شاخەکانی ڕۆژئاوا و باکووری هەرێم. هەروەها پلەکانی گەرما 2 بۆ 3 پلەی دیکە بەرزدەبنەوە.

 هاوکات خێرایی با لە دوای نیوەڕۆوە چالاک دەبێت و لە ناوچەکانی ناوەڕاست و ڕۆژهەڵاتی هەرێم خێراییەکەی دەگاتە سەرووی 35 کیلۆمەتر لە کاتژمێرێکدا.