بەپێی ڕاگەیەندراوێکی سەرۆکایەتیی هەرێمی کوردستان، نێچیرڤان بارزانی، سەرۆکی هەرێمی کوردستان و عەباس عێراقچی، وەزیری دەرەوەی کۆماری ئیسلامیی ئێران، پەیوەندییەکی تەلەفۆنییان ئەنجامدا.

لە میانی پەیوەندییەکەدا، هەردوولا گفتوگۆیان لەبارەی پەرەپێدانی پەیوەندییەکانی نێوان عێراق و هەرێمی کوردستان لەگەڵ کۆماری ئیسلامیی ئێران کرد، بەتایبەتی لە بوارەکانی ئاڵوگۆڕی ئابووری و بازرگانیدا، هەروەها بیروڕایان سەبارەت بە بەهێزکردنی هەماهەنگییەکان بۆ پاراستنی ئاسایشی سنوورەکانی نێوانیان ئاڵوگۆڕ کرد.

لە بەشێکی دیکەی گفتوگۆکەیاندا، تیشک خرایە سەر دوایین پێشهاتەکانی ناوچەکە و جەخت لە گرنگیی یەکخستنی هەوڵی وڵاتانی ناوچەکە کرایەوە بۆ چەسپاندنی ئاسایش و سەقامگیری لە ڕۆژهەڵاتی ناوەڕاست، ئەمە جیا لە تاوتوێکردنی چەند پرسێکی دیکەی جێی بایەخی هاوبەشی نێوان هەردوولا.