ئەمڕۆ لە ڕووداوێکی دڵتەزێندا لە پڕۆژەیەکی نیشتەجێبوون لە شاری دهۆک، بەهۆی ڕووخانی ئەسکەلەیەکەوە پێنج کرێکار لە بەرزاییەکی زۆرەوە کەوتنە خوارەوە و لە ئەنجامدا چوار کرێکار دەستبەجێ گیانیان لەدەستدا و کرێکارەکەی دیکەش بە سەختی بریندار بوو.

بەپێی زانیارییە سەرەتاییەکان، سەرجەم کرێکارەکان خەڵکی شاری دهۆکن و سەرقاڵی ڕاپەڕاندنی کارەکانیان بوون لەسەر یەکەیەکی نیشتەجێبوون، بەڵام بەهۆی داڕمانی ئەسکەلەکەیانەوە ڕووبەڕووی ئەو کارەساتە بوونەتەوە.
تەرمی هەر چوار کرێکارەکە ڕەوانەی پزیشکی دادوەری کراون و کرێکارە بریندارەکەش دۆخی تەندروستیی ناجێگیرە.

هاوکات، هێزە ئەمنییەکان و لایەنە پەیوەندیدارەکان لە شوێنی ڕووداوەکە دەستیان بە لێکۆڵینەوەیەکی ورد کردووە، بەمەبەستی دەرخستنی هۆکارە سەرەکییەکانی ڕووخانی ئەسکەلەکە و دڵنیابوونەوە لە جێبەجێکردنی مەرجەکانی سەلامەتیی پیشەیی لە پڕۆژەکەدا.

حسێن حەسەن- پەیامنێری KNN