شارەزایەکی کەشناسی هۆشداری دەدات لە ناجێگیریی کەشوهەوای هەرێمی کوردستان و ڕایدەگەیەنێت، لە کاتەکانی دوای نیوەڕۆی ئەمڕۆوە، شەپۆلێکی بەهێزی هەورەبروسکە و تاوەباران ناوچە جیاجیاکان دەگرێتەوە، بەتایبەتی لە پارێزگاکانی سلێمانی و هەڵەبجە کاریگەرییەکەی بەهێزتر دەبێت.

ئاراس جەبار، شارەزای بواری کەشناسی، لە بڵاوکراوەیەکدا ڕایگەیاند: "بەهۆی هاتنی بارستە هەوایەکی فێنک بۆ سەر ناوچەکانمان، ئەمڕۆ سێشەممە، لە کاتەکانی دوای نیوەڕۆوە ناجێگیرییەک لە کەشوهەوای هەرێمی کوردستان دروست دەبێت".

 ئاماژەی بەوەشکردووە، ئاسمان دەگۆڕێت بۆ نیمچەهەور و لە سەنتەری پارێزگاکانی هەولێر و کەرکوک و دهۆک، هەروەها ناوچەکانی باکووری گەرمیان، ئەگەری دروستبوونی هەورەبروسکەی توند و نمەباران هەیە.

سەبارەت بە ناوچەکانی دیکە، ئەو شارەزایەی کەشناسی ڕوونیکردووەتەوە کە لە سەنتەری پارێزگاکانی سلێمانی و هەڵەبجە، ناوچە شاخاوییەکان و سنووری ئیدارەکانی سۆران و ڕاپەڕین، کاریگەریی شەپۆلەکە زیاتر دەبێت و لە هەندێک شوێندا تاوەبارانی بەخوڕ دەبارێت.

هەروەها ئەگەری بارینی تەرزە لە ناوچە شاخاوییەکان هەیە و هەورەبروسکەکانیش بەهێزتر دەبن، بۆیە داوا لە هاووڵاتییان دەکات خۆیان لە چوونە ناوچە بەرز و شاخاوییەکان بەدوور بگرن.

لەسەر خێرایی با و کەشوهەوای ڕۆژانی داهاتووش، ئاراس جەبار دەڵێت: خێرایی با لەسەرخۆ بۆ مامناوەند دەبێت کە لە نێوان 10 بۆ 25 کیلۆمەتردایە لە کاتژمێرێکدا و ئاراستەکەشی باشووری ڕۆژئاوا دەبێت.

 هاوکات، کاریگەریی ئەم بارستە هەوا فێنکە بۆ ڕۆژانی چوارشەممە و پێنجشەممەش بەردەوام دەبێت، پلەکانی گەرما جێگیر دەبن و لە کاتەکانی دوای نیوەڕۆ بۆ ئێوارەدا ئەگەری دروستبوونی تاوەباران و هەورەبروسکە لە ناوچە شاخاوییەکان دەمێنێتەوە.