لە قەزای پێنجوێن هەڵمەتی گرتنی سەگی بێلانە و دوورخستنەوەیان لەناوچەکانی نیشتەجێبوون دەستیپێکرد، لایەنە پەیوەندیدارەکانیش بڕیاریان داوە بڕی پێنج هەزار دینار وەک پاداشت بدەن بە هەر کەسێک کە سەگێکی بێلانە بگرێت.

هەڵمەتەکە بە سەرپەرشتیی ڕاستەوخۆی قایمقامیەتی قەزای پێنجوێن و بە بەشداری و هاوکاریی هەردوو سەرۆکایەتیی شارەوانیی پێنجوێن و هۆبەی ڤێرتێرنەریی قەزاکە بەڕێوەدەچێت.

سەبارەت بە چارەنووسی سەگەکان دوای گرتنیان، بڕیار دراوە سەرجەم ئەو سەگانەی لەلایەن تیمەکان یان هاوڵاتییانەوە دەگیرێن، ببرێنە شێڵتەرێکی تایبەت و لەوێ لەلایەن تیمەکانەوە خزمەت بکرێن و چاودێرییان بخرێتە سەر.