شەپۆلێکی گەرما ڕوو لە هەرێمی کوردستان دەکات و شارەزایەکی کەشناسیش هۆشداری دەدات لە دروستبوونی هەورەبرووسکەی وشک، کە مەترسیی کەوتنەوەی ئاگر لە ناوچە جیاوازەکان دروست دەکات.

ئاراس جەبار، شارەزای بواری کەشناسی بڵاویکردەوە، بەهۆی لاوازبوونی کاریگەریی بەرزەپاڵەپەستۆ لەسەر ناوچەکان و چالاکبوونی نزمەپاڵەپەستۆیەک لە دەریای سوورەوە، لە سبەینێ یەکشەممەوە (10ی ئایاری 2026) پلەکانی گەرما ڕوو لە بەرزبوونەوەیەکی زیاتر دەکەن.

 ئاماژەی بەوەش کردووە، لە ڕۆژی دووشەممەوە کاریگەریی ئەو بارستەهەوا گەرمە زیاتر دەبێت و لە زۆربەی ناوچەکانی هەرێمی کوردستان پلەکانی گەرما بۆ سەروو 30 پلەی سەدی بەرز دەبنەوە، هاوکات لە سنووری پارێزگای کەرکووک و ئیدارەی گەرمیان نزیک دەبنەوە لە 40 پلەی سەدی و کەشێکی گەرمی هاوینە دەست پێدەکات.

سەبارەت بە گۆڕانکارییەکانی دیکەی کەشوهەوا، ئەو شارەزایە ڕوونیکردووەتەوە، بەهۆی هاتنی بارستەهەوایەکی سارد بۆ چینە بەرزەکانی بەرگەهەوا، ئەگەر هەیە لە ڕۆژانی سێشەممە و چوارشەممەدا حاڵەتێکی ناجێگیریی کەشوهەوا بە لاوازی دروست ببێت. بەو هۆیەوە هەورەبرووسکەی بنکەبەرزی وشک چالاک دەبێت و ئەگەری نمەبارانێکی کەم هەیە. هۆشداریشی داوە کە ئەو هەورەبرووسکانە وشک دەبن، ئەمەش مەترسی دروست دەکات لە کاتی بەرکەوتنیان بەو ناوچانەی گژوگیایان تێدا زەرد بووە و دەبێتە هۆی کەوتنەوەی ئاگر، پێشبینیش دەکرێت کاریگەریی ئەم بارستەهەوا گەرمە تا کۆتایی هەفتە بەردەوام بێت.