وەزیری دەرەوەی چین لە میانی کۆبوونەوەی لەگەڵ هاوتا ئێرانییەکەی ڕایگەیاند، وڵاتەکەی ئامادەیە بەردەوام بێت لە هەوڵەکانی بۆ کەمکردنەوەی گرژییەکان لە ناوچەکە و جەختی لەوەش کردەوە کە ڕاگەیاندنی ئاگربەستی تەواوەتی کارێکی بنەڕەتی و پێویستە.  وەزیری دەرەوەی ئێرانیش دەڵێت، تەنیا رێککەوتنێکی هەمەلایەنە و دادپەروەرانە قبوڵ دەکەن.

وانگ یی وەزیری دەرەوەی چین ئاماژەی بەوەش کرد، ناوچەکە لە وەرچەرخانێکی یەکلاکەرەوەدایە و ئەنجامدانی کۆبوونەوەی ڕاستەوخۆی نێوان لایەنەکان بە پێویست دەزانێت، هاوکات هێرشەکانی ئەمریکا و ئیسرائیلی بۆ سەر ئێران بە "نایاسایی" وەسف کرد.

لای خۆشییەوە، عەباس عێراقچی وەزیری دەرەوەی ئێران، ستایشی هەڵوێستی توندی چینی کرد لە ئاست شەرمەزارکردنی هێرشەکانی ئەمریکا و ئیسرائیل و ڕایگەیاند، چین دۆستێکی نزیکی ئێرانە و لەژێر سایەی بارودۆخی ئێستادا هەماهەنگییەکانی نێوانیان بەهێزتر دەبێت.

 عێراقچی جەختی لەوەش کردەوە، ئەو شەڕەی بەسەریاندا سەپێندراوە"دەستدرێژییەکی ئاشکرا و پێشێلکارییەکی ڕەهای یاسا نێودەوڵەتییەکانە"، ئاماژەی بەوەش کرد کە وڵاتەکەی لە دانوستانەکاندا هەموو هەوڵێک دەدات بۆ پاراستنی ماف و بەرژەوەندییە ڕەواکانی و تەنها ڕێککەوتنێکی دادپەروەر و گشتگیر قبوڵ دەکەن.