وەزارەتی ناوخۆی حکومەتی هەرێمی کوردستان بڕیاری دا بە قەدەغەکردنی هەموو جۆرە مامەڵەیەک بە دراوە ئەلیکترۆنییەکانی وەک (USDT) و بازرگانیی فۆڕێکس، و هۆشداریش دەداتە هاووڵاتییان کە هەر لایەنێک لەو بوارەدا کار بکات ڕووبەڕووی لێپرسینەوەی یاسایی و داخستن دەبێتەوە.

لە ڕاگەیەندراوێکدا وەزارەتی ناوخۆ ئاماژەی بەوە کردووە، بڕیارەکە لەبەر ڕۆشنایی ڕێنماییەکانی بانکی ناوەندیی عێراق و وەزارەتی دارایی و ئابووریی هەرێمی کوردستان دەرچووە و هۆکاری بڕیارەکەش دەگەڕێتەوە بۆ نەبوونی چوارچێوەیەکی یاسایی کە ماف و بەرژەوەندییەکانی هاووڵاتییان بپارێزێت، هەروەها جەخت لەوە کراوەتەوە کە تا ئێستا هیچ کۆمپانیایەک لە هەرێمی کوردستان و عێراق مۆڵەتی فەرمیی بۆ کارکردن لەو بوارانەدا پێنەدراوە.

وەزارەتەکە ئاشکراشی کردووە، هەر کەس و گروپێک لەژێر ناوی کۆمپانیادا کار بکات، شوێنەکەی دادەخرێت.

هاوکات داوا لە هاووڵاتییان دەکات بۆ پاراستنی سەرمایەکانیان لەو جۆرە مامەڵانە دوور بکەونەوە و ڕێنماییشیان دەکات کە هەر کەسێک مافێکی لای ئەو لایەنانە هەیە، با هەوڵی وەرگرتنەوەی بدات.