بەڕێوەبەرایەتیی کەشناسی و بوومەلەرزەزانی پێشبینییەکانی کەشوهەوای 48 کاتژمێری داهاتوو و ڕۆژی هەینیی بڵاوکردەوە و ڕایدەگەیەنێت، لە هەندێک ناوچە ئەگەری بارانبارین هەیە و پلەکانی گەرماش بەشێوەیەکی پلەبەندی بەرز دەبنەوە.

بەپێی پێشبینییەکان، ئەمڕۆ چوارشەممە، ئاسمان بەگشتی نیمچە هەور دەبێت. لە دوای نیوەڕۆدا لە ناوچە بەرز و شاخاوییەکان، هەروەها سەنتەری پارێزگای دهۆک و ئیدارەی زاخۆ، ئاسمان بۆ هەوری تەواو دەگۆڕێت و ئەگەری تاوەبارانی بەهاری هەیە، کە لە هەندێک ناوچە ڕەنگە بەشێوەی لێزمەباران ببارێت. هاوکات لە کاتەکانی ئێوارەدا ئەگەری کەمێک بارانبارین لە سەنتەری پارێزگای سلێمانی، هەڵەبجە و بەشێک لە ناوچەکانی پارێزگای کەرکوک هەیە.

سەبارەت بە کەشوهەوای سبەینێ پێنجشەممە، کەشناسی ئاماژەی بەوە کردووە کە لە سەنتەری پارێزگاکاندا ئاسمان نیمچە هەور دەبێت و کەشوهەوا تا ئاستێک سەقامگیر دەبێت، بەڵام لە قەزا و ناحیەکانی ناوچە شاخاوییەکان ئەگەری چڕبوونەوەی هەور و دابارین لە دوای نیوەڕۆدا هەیە. خێرایی با لەسەرخۆ دەبێت و پلەکانی گەرماش بەراورد بە ئەمڕۆ کەمێک بەرز دەبنەوە.

هەروەها بۆ ڕۆژی هەینی ئاماژە بەوە کراوە کە ئاسمان بەگشتی ساماڵ و پەڵەهەور دەبێت و هیچ حاڵەتێکی بارانبارین پێشبینی ناکرێت، هاوکات پلەکانی گەرماش بەراورد بە ئەمڕۆ دوو پلەی سیلیزی بەرز دەبنەوە و کەشوهەوای ناوچەکە جێگیر دەبێت.