شەپۆلی ئەو بارانبارینەی ڕووی لە هەرێمی کوردستان کردبوو کۆتایی هاتووە، بەڵام پێشبینی دەکرێت لە (48) کاتژمێری داهاتوودا کەشوهەوایەکی ناسەقامگیری بەهاری بەردەوام بێت و لە هەندێک ناوچە تاوەباران و هەورە تریشقە ڕووبدات.

بەپێی پێشبینییەکانی کەشناسی، ئەمڕۆ سێشەممە، ئاسمانی هەرێم بەگشتی نیمچە هەور دەبێت و لە کاتەکانی دوای نیوەڕۆدا، لە ناوچە شاخاوییەکان و سەنتەری بەشێک لە قەزا و ناحیەکان تاوەبارانی کورتخایەن دەبارێت. هاوکات لە سەنتەری پارێزگاکانی سلێمانی و دهۆک ئەگەری نمەباران و هەورە تریشقە هەیە، بەڵام لە سنووری ئیدارەی ڕاپەڕین ئەگەری دابارین بەراورد بە ناوچەکانی دیکە زیاتر دەبێت و پلەکانی گەرماش کەمێک نزم دەبنەوە.

سەبارەت بە کەشوهەوای سبەینێ چوارشەممە، ئاسمان لەنێوان ساماڵ و نیمچە هەوردا دەبێت، لەگەڵ ئەگەری گەواڵەبارانی بەهاری لە ناوچە شاخاوییەکان بەشێوەی پچڕپچڕ، بەجۆرێک گۆڕانکاری لە شێوازی داباریندا دروست دەبێت و ڕەنگە ناوچەیەک بارانی لێ ببارێت و ناوچەیەکی دیکە بێ باران بێت. هەروەها پلەکانی گەرما کەمێک بەرز دەبنەوە، کە بەرزترین پلە لە گەرمیان دەبێت بە (23) پلەی سیلیزی و نزمترینیش لە حاجی ئۆمەران بە (13) پلەی سیلیزی دەبێت.