مەکتەبی سیاسیی پارتی دیموکراتی کوردستان، لە بروسکەیەکی فەرمیدا پیرۆزبایی گەرمی ئاراستەی دانا ئەحمەد مەجید کرد بەبۆنەی هەڵبژاردنی وەک ڕێکخەری گشتیی بزووتنەوەی گۆڕان و کۆتاییهاتنی سەرکەوتووانەی کۆنفرانسی بزووتنەوەکە.

لە پەیامەکەدا، پارتی وێڕای پیرۆزبایی لە ئەندامانی نوێی جڤاتی نیشتمانی، هیوای خواستووە بڕیار و ڕاسپاردەکانی کۆنفرانس ببنە هۆکاری کاراکردنی ڕۆڵی بزووتنەوەی گۆڕان وەک هێزێکی سیاسی لە پێناو پاراستنی یەکڕیزی، یەکگوتاریی کوردستانی و قەوارەی سیاسی و یاسایی هەرێمی کوردستان.


دەقی پەیامی مەکتەبی سیاسیی پارتی دیموکراتی کوردستان بۆ بزووتنەوەى گۆڕان.

بۆ بەرێز/ کاک دانا ئەحمەد مەجید ڕێکخەرى گشتى بزووتنەوەى گۆڕان

بەبۆنەى بەستن و بەسەرکەوتوویى کۆتایی هاتنى کۆنفرانسى بزووتنەوەى گۆڕان و هەڵبژاردنى بەڕێزتان وەکو ڕێکخەرى گشتى، پیرۆزبایی گەرممان لە ئێوە و ئەندامانى هەڵبژێردراوى جڤاتى نیشتیمانى و سەرجەم کادیر و ئەندامانى بزووتنەوە تێکۆشەرەکەتان دەکەین و، هیواى سەرکەوتن و سەرفرازیتان بۆ دەخوازین.

ئومێدەوارین بڕیار و ڕاسپاردەکانى کۆنفرانس و دەستوورى نوێى بزووتنەوەکەتان گڕوتێنێکى دیکە بە خەبات و تێکۆشانتان ببەخشێت و، وەکو هێزێکى سیاسى ڕۆڵی بەرچاوى خۆتان ببینن لە یەکڕیزى و یەکگووتارى کوردستانى و پاراستنى دەستکەوتنەکانمان و قەوارەى سیاسى و یاساىی هەرێمى کوردستان.

دووبارە پیرۆزباییتان لێدەکەین، هەر سەرکەوتووبن.

مەکتەبى سیاسیی پارتى دیموکراتى کوردستان
 ١٨ى شوباتى ٢٠٢٦