بەڕێوەبەرایەتی خۆسەر لە کۆبانێ و ئەنجومەنی ئابوری لە باکوور و ڕۆژهەڵاتی سووریا، زەنگی مەترسییان لێدا و ڕایانگەیاند کە شارەکە بەهۆی گەمارۆیەکی توندەوە ڕوبەڕوی کارەساتێکی مرۆیی بوەتەوە.

هەواڵ: KNN

 ئیدارەی خۆسەر داوای لە کۆمەڵگەی نێودەوڵەتی کرد دەستبەجێ فشار بخەنە سەر هێزە هێرشبەرەکان بۆ ڕاگرتنی دەستدرێژییەکانیان

بەڕێوەبەرایەتی خۆسەر لە بەیاننامەیەکی خێرادا سێ خاڵی سەرەکی وەک هۆشداری خستوەتە ڕو:
١. ئەو هاوکارییە کەمەی دەگاتە کۆبانێ، بەهیچ شێوەیەک تێرکەری پێداویستییەکان نییە.
٢. پێویستە هێرش و دەستدرێژییەکان بۆ سەر کۆبانێ دەستبەجێ ڕابگیرێن.
٣. بێدەنگی نێودەوڵەتی بەرامبەر ئەم دۆخە، ئازارەکانی خەڵکی شارەکە و زەحمەتییەکان زیاتر دەکات.

هاوکات  ئەنجومەنی ئابووری ئاشکرای کردوە کە بەهۆی ئەو گەمارۆیەی هێزەکانی  حکومەتی کاتی سوریاو  گروپە توندڕەوەکانی نزیک لە تورکیا  بۆ ماوەی 10  ڕۆژە بەسەر شارەکەیاندا سەپاندوە، بڕی ئارد و سوتەمەنی بە شێوەیەکی مەترسیدار کەمی کردوە.

دەشڵێن  لە ئێستادا نزیکەی 600  هەزار کەس، کە بەشێکی زۆریان ئاوارەی ناوچەکانی ڕەققە، تەبقە و گوندەوارەکانن، لەناو شارەکەدا گیریان خواردوە و لە بارودۆخێکی مرۆیی سەختدا دەژین.

ماوەی دەرۆژە بەهۆی   بڕانی کارەبا، ئاو و ئینتەرنێت ژیانی ڕۆژانەی هاووڵاتییانی کۆبانێ زەحمەت بوە، نانەواخانەکان 24  کاتژمێر کاردەکەن بۆ دابینکردنی نان بۆ ئەو ژمارە زۆرەی دانیشتووان و ئاوارەکان، بەڵام کەمیی ئارد و شیری منداڵان وەک گەورەترین هەڕەشە لەسەر ژیانی خەڵکەکە ماوەتەوە.