لە قامیشلۆ دوو تەقینەوە ڕوویاندا و هەسەدەش لەبارەی زیانەکان ڕوونکردنەوە دەدات.

هەواڵ:KNNC

بەرەبەیانی ئەمڕۆ چوارشەممە 21-01-2026 دوو تەقینەوە شاری قامشلۆیان هەژاند. یەکەمیان بە درۆن و ئەوی دیکەش لە رێگەی شۆفێری ماتۆڕسکیلێک بوو.

ناوەندی راگەیاندنی هێزەکانی سووریای دیموکرات- هەسەدە بڵاویکردەوە، لە یەک کاتدا دوو تەقینەوە لە قامیشلۆ ڕوویانداوە، یەکێکیانهێرشێکی درۆنیی بووە بۆسەر گەڕەکی (عویجە) لە قامشلۆ، هێرشەکەی دیکەشیان خۆکوژیی بووە و هێرشکارێک کە ماتۆڕسکیلی پێبوو، خۆی لەنێو گەراجی نەخۆشخانەی (دڵ و چاو) تەقاندەوە.

بەپێی زانیارییەکانی هەسەدە، زیانەکان تەنیا مادی بوون و تاوەکو ئێستا هیچ بریندار و گیانلەدەستدانێکی سڤیل یان سەربازی تۆمار نەکراوە.

بەرپرسێکی ئاساییشیش لە ناوچەکە ڕایگەیاندوە،  ئەو شوێنانەیان کردووەتە ئامانج کە پێشتر لەلایەن هێزە ئەمنییەکانەوە چۆڵکرابوون، بۆیە زیانەکان تەنیا ماددی بوون و زیانی گیانی لێنەکەوتووەتەوە.

 ئەم تەقینەوانە تەنیا ماوەیەكی كەم دوای ئەوە دێن کە وەزارەتی بەرگریی سووریا و فەرماندەیی گشتیی هەسەدە لەسەر ئاگربەستێکی چوار رۆژە رێککەوتن.