ناکۆکییەکانی پرسی سەرۆککۆمار بەردەوامە و سەرچاوەیەکیش دەڵێت پرسەکە ناوی کەسەکان نییە بەڵکو شکاندنی ڕێککەوتنی نێوان پارتی و یەکێتییە و ئەگەر گۆڕانکاریی بکرێت دەبێت لە پۆستەکانی سەرۆکایەتی هەرێم و پۆستەکانی دیکەشدا بکرێت، پۆستەکە بە پۆستێکی عێراقی گەورە ناودەبات و دەڵێت نابێت لە هەرێمدا قەتیس بکرێت.

هەواڵ:KNNC

لەدوای یەکلابوونەوەی پۆستەکانی دەستەی سەرۆکایەتی پەرلەمان لە دووشەممە و سێشەممەی ئەم هەفتەیەدا و پێش چوونە ساڵی نوێ، ئێستا و بۆ ماوەی 30 ڕۆژ کات هەیە کە کەسێک بۆ پۆستی سەرۆکایەتی کۆمار یەکلا بکرێتەوە کە پشکی کوردە و تا ئێستاش هیچ کەسێک بە فەرمی کاندید نەکراوە، مەسعود بارزانی سەرۆکی پارتیش وتی کە دەبێت گۆڕانکاریی لە چۆنییەتی هەڵبژاردنی سەرۆککۆماردا بکرێت و پۆستەکە موڵکی کەس نییە و دەکرێت کەسێک بە کۆدەنگی لە دەرەوەی پارتی و یەکێتی ئەو پۆستە وەربگرێت.

لەوبارەیەوە سەرچاوەیەک بە شەرقلئەوسەتی ڕاگەیاندوە، تا ئێستا پۆستی سەرۆککۆمار کێشەی قوڵ و گەورەنەبووە لەنێوان پارتی و یەکێتیدا، چونکە بابەتەکە ڕێککەوتن بووە و پۆستەکە پشکی یەکێتی بووە لەبەرامبەر پۆستی سەرۆکی هەرێم و پۆستە سەروەرییەکانی دیکە هەرێم و لە 2005ەوە بەو جۆرە دابەشکراوە.

ئەو سەرچاوەیە ئاماژەی بەوەشداوە، گۆڕانکارییکردن لە چۆنییەتی هەڵبژاردنی سەرۆککۆمار پەیوەست نییە بە ناکۆکی لەسەر ناو و کەسایەتییەوە بەڵکو ئەگەر شکاندنی ڕێککەوتنی نێوان پارتی و یەکێتییە کە دوو دەیەیە بەو جۆرە پۆستەکانیان لەسەر دابەشکردوە، پۆستەکانی سەرۆککۆمار و سەرۆکهەرێم و پۆستە سەروەرییەکانی دیکە پاکێجێکن گۆڕانکاریی لە یەکێکیان گۆڕانکاریی لەوی دیکە دروست دەکات.

سەرچاوەکە بە شەرقلئەوسەتیشی وتوە، پۆستی سەرۆککۆمار پۆستێکی نیشتیمانیی عێراقی گەورەیە و ناکرێت لە هەرێمدا قەتیس بکرێت، بوونی ئەو پۆستە وەک پشکی کورد بە مانای دابڕینی لە عێراق نایەت...