مەزڵوم عەبدی دەڵێت لەگەڵ حکومەتی سوریا لێکتێگەیشتنی باش هەیە نزیکن لە ڕێککەوتن و مەرجە سیستمی سوریا ناناوەندیی بێت.


هەواڵ:KNNC


مەزڵوم عەبدی فەرماندەی گشتی هێزەکانی سوریای دیموکرات، لە میانی بەشداریکردنی لە کۆبوونەوەی دەستەی ڕاوێژکاری بۆ پاڵپشتیکردنی لیژنەی دانوستان لە باکور و ڕۆژهەڵاتی سوریا، بۆ تاوتوێکردنی دوایین پێشهاتە سیاسییەکان گۆڕەپانی سوریا و ڕێککەوتنی 10ی ئازار، ئاشکرایکرد کە ئێستا لێکتێگەیشتنی باش لەنێوان کورد و دەسەڵاتی سوریا هەیە.

مەزڵوم عەبدی وتی لەگەڵ دەسەڵاتی سوریا گەیشتوونەتە لێکتێگەیشتنێکی هاوبەش سەبارەت بە یەکخستنی هێزە سەربازییەکان بە شێوەیەک کە هاوتەریب بێت لەگەڵ بەرژەوەندی گشتیی و بابەتی دەستوریی هەیە کە پێویستی بە کات هەیە بۆ گەیشتن بە چارەسەرێک کە هەموو سوریا بگرێتەوە.

مەزڵوم کۆبانێ جەختی لە خۆبەڕێوەبەریی ڕۆژئاوای کوردستان کردەوە و وتی دەیانەوێت هەرێمەکە لەلایەن خۆیانەوە بەڕێوەببرێت.

فەرماندارەکەی کورد جەختی لە نانەوەندیی دەسەڵاتی سوریا کردەوە و وتی مەرجە سیستم ناناوەندیی بێت، فۆڕمی حکومەت و بەشداری هەموو پێکهاتەکان پایەی بنەڕەتین و ئەمەش پێویستی بە گفتوگۆی قووڵتر هەیە بۆ گەیشتن بە دەستوورێک کە ڕەنگدانەوەی خواستی هەموو سورییەکان بێت.

ئاماژەی بەوەدا، پێشکەوتن هەیە لە داڕشتنی دیدگەیەکی هاوبەش سەبارەت بە دەروازە سنوورییەکان و دەبێت سامانە سروشتییەکان هی هەموو سوورییەکانبن.

لەکۆتاییشدا وتی، لێکتێگەیشتنی باش هەیە لە بۆچوونەکاندا لەسەر پرسە سەرەکییەکان و  هیواخوازن لە داهاتوودا بگەنە ڕێککەوتنی تەواوەتی لە تەواوی پرسەکاندا...