چوارچێوەی هەماهەنگی بەردەوامە لە هەوڵەکانی دیاریکردنی سەرۆکوەزیرانی داهاتوو دەشڵێن دەبێت سەرۆکی حکومەت کەسێکی دەستپاک و بەتوانابێت.

هەواڵ:KNNC


چوارچێوەی هەماهەنگی لەدوا کۆبوونەوەی خۆییدا تەوەرەکانی پێکهێنانی حکومەتی خستە بەرباس و ڕایگەیاند: لە کۆبوونەوەکەدا تاووتوێی پێوەر و بنەما سەرەکییەکانی پۆستی سەرۆکوەزیران،شێوازی هەڵبژاردنی لەنێو هاوپەیمانییەتییەکەدا باسکراوە، بەجۆرێک کە دڵنیایی بدات لە پەسەندکردنی پێوەرە نیشتمانییە ڕوونەکان کە لێهاتوویی و پاکیزەیی و توانای بەڕێوەبردنی دەوڵەت و ڕووبەڕووبوونەوەی ئاڵنگارییەکانی قۆناغی داهاتوو لەبەرچاو بگرێت.

لە کۆبوونەوەکەدا سەرکردایەتی چوارچێوەکە ڕاپۆرتێکی پێشکەشکرد و ڕێککەوتن کرا لەسەر بەردەوامبوونی کارەکان و تەواوکردنی ئەرکەکانیان لە هەڵسەنگاندنی کاندیدەکان بەپێی پێوەرە نیشتیمانییەکان.

لە کۆبوونەوەکەدا جەختیش کرایەوە لە پابەندبوون بە دەستور کاتی دیاریکراو بۆ پێکهێنانی حکومەت لەپێناو پاراستنی سەقامگیریی سیاسی ڕێزگرتن لە خواستی دەنگدەرە عێراقییەکان.