سەرۆکی کۆمیسیۆنی لێکۆڵینەوەی سه‌ر به‌ نەتەوە یەکگرتووەکان له‌سوریا دوپاتیكرده‌وه‌؛ هێشتا سوریا لە بازنەی توندوتیژی و پەرەسەندنی پێشێلکارییەکاندا ماوه‌ته‌وه‌.

پاولۆ سێرجیۆ پینهایرۆ دووپاتی کردەوە ؛ هێشتا سوریا لە گێژاوی قووڵی توندوتیژیدا نوقمه‌و  بە شێوەی جۆراوجۆر توندوتیژییه‌كان پراكنیزه‌  ده‌كرێن به‌تایبه‌تیش له‌ناوچه‌ عه‌له‌وی و دروز نشینه‌كان و هاوڵاتیانی مه‌ده‌نی و ژنان، ئه‌مه‌ جگه‌ له‌وه‌ی كه‌ كاولكاری و ئاواره‌بوون هه‌ر به‌رده‌وامن.

ئاماژه‌ی به‌وه‌شكرد له‌ ڕووداوەکانی مانگی ئازاری ئەمساڵدا مەزەندە ده‌كرێت 1400  ژن و پیاو و منداڵ لە پارێزگاکانی لازقیە و تارتوس و حەما  كۆمه‌ڵكوژكراون.

سەرۆکی کۆمیسیۆنی لێکۆڵینەوەی سه‌ر به‌ نەتەوە یەکگرتووەکان له‌سوریا  دوپاتیكرده‌وه‌ كه‌ ئێستا  سورییه‌كان  دەرفەت و چانسی ئاوه‌دانكردنه‌وه‌ی وڵاته‌كه‌یان له‌به‌رده‌مدایه‌  به‌و مه‌رجه‌ی  لەسەر بنەمای ڕێزگرتن لە کەرامەت و مافی مرۆڤ سه‌رجه‌م هاوڵاتیان بێت.

ناوبراو داواشی لە حکومەتی کاتی سوریا و وڵاتانی ئەندام لە نه‌ته‌وه‌ یه‌كگرتوه‌كان کرد بەپەلە چارەسەری ڕەگ و ڕیشەی توندوتیژییەکانی ئەم دواییە بکەن و ڕێگری لە دووبارەبوونەوەی پێشێلکارییەکان بکەن و کاربکەن بۆ دروستکردنی متمانە لە نێوان دەوڵەت و پێکهاتە زیانلێکەوتووەکاندا، ئه‌وه‌ش له‌رێگه‌ی لێپرسینەوە لەگەڵ بەرپرسانی ئەو پێشێلکارییانە.