ئێران وەڵامی قسەکانی دوێنێی ترەمپ دەداتەوە کە لە پەرلەمانی ئیسرائیل کرد و  دەڵێن؛"ئەمەریکا کە وەک گەورەترین دروستکەری تیرۆر و پشتیوانی ڕژێمی تاوانباری ئیسرائیلە، هیچ مافێکی تۆمەتبارکردنی وڵاتانی نییە. و ئارەزوی سەرۆکی ئەمەریکا بۆ ئاشتی و گفتۆگۆ، پێچەوانەی ڕەفتارەکانییەتی بەرامبەر گەلی ئێران.

هەواڵ:KNNC

ئەمڕۆ سێشەممە، تاران لە ڕێگەی وەزارەتی دەرەوەی وڵاتەکەوە، بە راگەیەندراوێک وەڵامی دۆناڵد ترەمپ داوەتەوە و رایگەیاندوە؛ واشنتۆن بە پشتیوانیکردنی ئیسرائیل و پێدانی چەکی بێشومار بەو دەسەڵاتە، خۆی گەورەترین هۆکاری ناسەقامگیری و تێکدانی ئاسایشی ناوچەکەیە.

ئێران ئەمەریکای بە دروستکردنی داعش تۆماتبارکردوە و ئاماژەیان بەوەداوە، ئەوان ڕۆڵی بەرەنگاربونەوەیان هەبوە لە ڕوبەروبونەوەی داعشدا و قاسم سولەیمانیشان وەک نمونە باسکردوە کە بەدەستی ئەمەریکا کوژرا.

لەبارەی قسەکانی ترەمپیشەوە لەسەر پرسی بەرنامە ئەتۆمییەکان، ئاماژەیان بەوەکردوە؛ بانگەشەی بێبنەمان و هەرگیز بەم قسانە ناتوانن تاوانە هاوبەشەکانی ئەمەریکا و ئیسرائیل لە پەلاماردانی خاکی ئێران و کوشتنی ڕۆڵەکانی ئێران، بشارنەوە.

جەختیشدەکەنەوە کە ئەو قسانە بەرپرسیارەتی ئەمەریکا بۆ ئەو هەموو تاوانە قورستر دەکات و ڕق و کینەی قوڵی سیاسەتداڕێژەرانی ئەمەریکا بەرامبەر  بە گەلی ئێران دەردەخات.