وەزیری دەرەوەی ئێران سەبارەت بەدۆسێی ئەتۆمی وڵاتەكەی دەڵێت تاکە چارەسەر ڕێڕەوی دیپلۆماسییە و  لەبەر ڕۆشنایی گۆڕانکارییەکانی ئەم دواییەش  كە هاتونەتە ئاراوە ، چیتر بەناو "ڕێککەوتنی قاهیرە" كاری پێناكرێت.

هەواڵ ؛ KNNC

ئاژانسی هەواڵی تەسنیمی ئێران بڵاویكردەوە ئەمرۆ یەكشەممە عەراقچی لە میانی كۆبونەوەی  لەگەڵ باڵیۆز و نوێنەرانی وڵاتان لە تاران، ڕوونی کردەوە ،کە ئامانجی دیدارەكەی لەگەڵیاندا بۆ ئاگادارکردنەوەیانە  لە دوایین پێشهاتەکانی پەیوەست بە دانوستانەکانی نیویۆرک و میکانیزمی "سناپباک" بۆ سەپاندنەوەی سزاکان بەسەر ئێراندا.

بەوتەی عەراقچی "ئەزموونەکان سەلماندوویانە کە جگە لە چارەسەری دیپلۆماسی بۆ پرسی بەرنامەی ئەتۆمی هیچ چارەسەرێکی تر لە ئارادا نییە"، دەشڵێت: "هەڕەشە سەربازییەکان و چالاککردنی میکانیزمی سناپباک تاقیکراونەتەوە، بەڵام هیچ ئەنجامێکیان بەدەست نەهێناوە. هەروەک چۆن هێرشی سەربازی چارەسەر نییە.

ناوبراو ڕەخنەشی لە ڕۆڵی سێ وڵاتی ئەوروپی (فەرەنسا، بەریتانیا و ئەڵمانیا) گرت و رایگەیاند : "ڕۆڵی خۆیان لە دانوستانەکاندا لاواز کردووە"، واتە کاریگەرییان لەسەر هەر چارەسەرێك لە داهاتوودا سنووردار دەبێت.
ئاماژەی بەوەشکرد، "ئێران پابەندە بە هەڵوێستی خۆیەوە کە داوای دانوستان دەکات، بەمەرجێک بە مەبەستی پاک و لە بەرژەوەندی هەردوولا بەڕێوەبچێت".

لەچەند هەفتەی رابردودا ئێران و ئاژانسی نێودەوڵەتی وزەی ئەتۆمی بە سەرپەرشتی میسر ڕێککەوتنێکیان واژۆ کرد و بەوپێیەش "زەمینە سازی دەكرا بۆ دەستپێکردنەوەی هاوکارییەکانی نێوان تاران و ئاژانسی ناوبراو سەبارەت بە پرسی ئەتۆمی ئێران".