دوای سەردانەکەی بۆ ئەمەریکا و کۆبونەوەی لەگەڵ هاوڵاتییانی وڵاتەکەی لە واشنتۆن، ئەحمەد شەرع ڕایگەیاند؛ ئێمە بڕیارمانداوە وڵاتەکەمان بنیات بنێین و خەڵک بتوانن بگەڕێنەوە سەر ماڵ و حاڵی خۆیان

هەواڵ:KNNC

سەرۆکی کاتی سوریا لەبارەی بنیادنانی وڵاتەکەی و پلانەکانیان بۆ سوریایەکی نوێ، لە میانی کۆبونەوەی لەگەڵ هاوڵاتییانی وڵاتەکەی رایگەیاند؛ سوریا یەکەم شوێنە کە خەڵکانێک بە پاشخانی ئایینی و ئایدیۆلۆژی جیاوازەوە بۆ ماوەیەکی زۆر پێکەوە ژیاون.

ئاماژەی بەوەشکرد؛ وڵات بە خۆشەویستی و هێزی سوریەکان بنیات دەنێت نەک بە تاوەر و باڵەخانە و ئەوان بڕیاریانداوە وڵاتەکەیان بنیات بنێن، بە جۆرێک خەڵک بتوانن بگەڕێنەوە سەر ماڵ و حاڵی خۆیان.

ناوبراو لەبارەی باسی لە دەسەڵاتی پێشوی سوریاشکردوە و وتویەتی؛ سوورییەکان بۆ ماوەی 60 ساڵ بەرگەی ڕژێمی پێشویان گرت و شانسێکی گەورەیان پێدا، بەڵام لە کۆتاییدا دژی نادادپەروەرییەکەی ڕاپەڕین.

ئەحمەد شەرع، دوێنی گەشتە واشنتۆن و ئەمە یەکەم سەردانی سەرۆکێکی سوریایە لە دوای 58 ساڵ بۆ ئەو ویلایەتە و بڕیاریشە لە کۆبونەوەی ئەنجومەنی نەتەوەیەگرتوەکان وتاریک پێشکەشبکات و ئایدیای حکومەتەکەی بۆ ئایندەی سوریا بخاتە ڕو.