ئۆپراسیۆنی چڕی ئیسرائیل لە حەوتەم ڕۆژیدایە بۆ داگیرکردنی غەززە و بەپێی سەرچاوە پزیشکییەکانی کەرتەکەش، لە چەند کاتژمێری ڕابردودا بەهۆی  تۆپبارانی چڕی  ئیسرائیلەوە بۆ سەر ناوچە جیاوازەکان 68  هاوڵاتی گیانیان لەدەستداوە

هەواڵ:KNNC

ئەمڕۆ دووشەممە، هاوکات لەگەڵ بەردەوامی ئۆپراسیۆنە چڕەکانی ئیسرائیل،  تەندروستی غەززە ڕایگەیاندوە؛ لە چەند کاتژمێری رابردودا، ئیسرائیل هێرشەکانی چڕترکردوەتەوە و بەهۆیەوە 68 کەس گیانیان لەدەستداوە.


دەزگای فریاگوزاری و کارەکانی نەتەوە یەکگرتوەکان بۆ پەنابەرانی فەلەستین (UNRWA) لە ڕاپۆرتێکدا ڕایگەیاندوە؛  یەک ملیۆن و 900 هەزار کەس بە زۆرەملێ ئاوارەبون لە کەرتی غەززە و دەشڵێت؛ ئەو وێرانکارییە لە غەززە هەیە وێنەی نییە.

ئەمە لە کاتێکدایە لە سەرەتای شەڕەکەوە ڕێکەوتی  7ی تشرینی یەکەمی 2023 دەستی پێکرد، زیاتر لە 65 هەزار و  400  کوژراو و 166 هەزار و 500 کەسی دیکەش بریندار بون.