حەماس یاداشتێکی بەپەلەی بۆ وەزیرانی دەرەوەی وڵاتانی عەرەبی و ئیسلامی، وڵاتانی کاریگەر و ڕێکخراوە نێودەوڵەتییەکان نارد و وێرای ئاشکراکردنی  وردەکاریی هێرشی ئیسرائیل بۆسەر تیمی دانوستانکاری لە وداوای کرد کە" ئیسرائیل بایکۆت بکەن و لە ڕوی سیاسی و ئابورییەوە گۆشەگیری بکەن".

هەواڵ:KNN

لە راگەیەنراوێکدا کە حەماس رۆژی 14ی ئەیلول ئاراستەی وەزیرانی دەرەوەی وڵاتانی عەرەبی وئیسلامی و رێکخراوە نێودەوڵەتییەکانی کردوە، هاتوە" لە هێرشی ئیسرائیل بۆسەر ئەندامانی دانوستانکارمان لە قەتەر، هەمو ئەندامانی تیمەکەمان ڕزگاریان بو".

لە راگەیەنراوەکەدا هاتوە کە " تیمی دانوستانکاری حەماس بۆ گفتوگۆکردن و وەڵامدانەوەی پێشنیازی ئاگربەست لە کۆبونەوەدابون ".

رونیشیکردەوە" حەماس زۆرترین نەرمی نواندوە بۆ ڕاگرتنی جینۆساید ، بەڵام حکومەتی داگیرکەر بە بەردەوامی هەمو ڕێککەوتنێکی لەناوبردوە لەڕێگەی تیرۆرکردن و زیادکردنی مەرج و ئەنجامدانی کۆمەڵکوژی ".

لە راگەیەنراوەکەدا حەماس دەڵێت"  سەرەڕای پابەندبونی تەواوی بزوتنەوەکە بە بڕگەکانی ڕێککەوتننامەی 17 ژانویەی 2025، دوژمن پاشگەز بوەتەوە و دەستدرێژیەکانی بە کۆمەڵکوژی و ئاوارەبون و برسێتی دەستیپێکردوەتەوە، داوا لە کۆمەڵگەی نێودەوڵەتی و وڵاتانی عەرەبی و ئیسلامی دەکەین فشار بخەنە سەر دەستدرێژی و کۆمەڵکوژی لە غەززە  و قودس و کۆتایی بە خۆبەزلزانینی ئیسرائیل بهێنن کە یاسا نێودەوڵەتییەکان پشتگوێ دەخات، هەروەها داوا لە وڵاتان دەکەین کە ڕێز لە یاسا نێودەوڵەتییەکان بگرن و وەڵامی مافە ڕەواکانی گەلەکەمان بدەنەوە، ئیسرائیل بایکۆت بکەن و لە ڕوی سیاسی و ئابورییەوە گۆشەگیری بکەن و سەرکردە داگیرکەرەکان لە دادگا نێودەوڵەتییەکان بە تاوانی جینۆساید و پێشێلکردنی سەروەری وڵات دادگایی بکەن".