لە کۆتاییەکانی وەرزی هاوینی ئەمساڵداین و لە بەشێکی زۆری پارێزگاکانی هەرێمی کوردستان پلەکانی گەرما لە بەرزیدا ماوەتەوە و کەشناسێکیش دەڵێت کۆتایی بە پلەی گەرمای  نیوە کوڵان دێت.

هەواڵ:KNNC


محەمەد کەمال، شارەزای کەشوهەوا،  بە دیجیتاڵ میدیای کەی ئین ئین ڕاگەیاند لە ئێستادا لەناو شەپۆلێکی گەرماداین کە کۆتا شەپۆلی ئەمساڵە و لە دەریای هندییەوە گەیشتوەتە هەرێمی کوردستان، دەشڵێت؛ پلەکانی گەرما 4 بۆ 5 پلەی سیلیزی بەرزدەبنەوە و  ئەم شەپۆلە بۆ ماوەی هەفتەیەک بەردەوام دەبێت.

لەبارەی کۆتایی هاتنی شەپۆلەکەشەوە ئاماژەی بەوەکرد،  لە ڕۆژی یەکشەمەوە 10ی ئابی 2025دەستیپیکردوە  و لە رۆژی پێنجشەممە 14 ی ئاب کۆتایی دێت و  چەقی گەرمای ئەم شەپۆلە گەرمیانەو  لەو سنورە پلەکانی گەرما دەگەنە 50 پلەی سیلیزی کە پلەی گەرمای پڕوکێنەرە لە هەرێمی کوردستان.

محەمەد کەمال دەڵێت،پاش 21 ی ئەیلول کە دەچینە وەرزی پایزەوە بە شێوەیەکی گشتی پلەکانی گەرما لە هەرێمی کوردستان گۆڕانکارییان بەسەردا دێت و لە ناوچەکانی (سلێمانی و هەڵەبجە وتەنانەت دهۆک و زاخۆ و دەوروبەری لە شەودا کەشوهەوا فێنک دەبێت، بەڵام لە ناوچە پێدەشتەکانی وەک (دەشتی گەرمیان و کەرکوک و هەولێر وئەو دەوروبەرە) پێشبینی دەکەن لە کۆتایی مانگی نۆ و سەرەتای مانگی دە ئەم گۆڕانکاریە ڕوبدات.


محەمەد کەمال گوتیشی، بەپێی ئەو داتایانەی کە لەبەر دەستیاندایە لە دوای 25ی ئەیلول لە ناوچە شاخاوییەکانی پارێزگای دهۆک و هەولێر و سلێمانی بارانبارین دەستپێدەکات .

سەبارەت بەو وەرزی دابارینی ئەمساڵیش ئەو کەشناسە دەڵێت: لە 20ی تشرینی یەکەم پێشبینی باران بارین دەکەن بە شێوەیەکی پچڕ پچڕلە تەواوی هەرێمی کوردستان، پێشبینی وەرزێکی باشی دابارینیش دەکرێت.