سەرۆک کۆماری ئێران رایدەگەیەنێت: ئەگەر تاران وەڵامی دەستدرێژیەكەی تەلئەبیبی نەدایەتەوە، ناوچەكە روبەڕوی جەنگی گشتگیری كۆنترۆڵ نەكراوە دەبویەوە.


هەواڵ: (KNNC)


ئەمڕۆ هەینی، لەمیانەی پێشكەش كردنی وتارێكی لە كۆڕبەندی یەکێتی ئابوری ئۆراسیا، مەسعود پزیشكیان، سەرۆك كۆماری ئێران رایگەیاند: ئەو دەستدرێژییەی كەتەلئەبیب كردیە سەر تاران و دواتریش  بە پاساوی هەبونی چەكی ئەتۆم واشنتۆن، دامەزراوە ئەتۆمییەكانی وڵاتەكەی بەئامانج گرت، ئەگەر تاران وەڵامی هێرشەكانی نەدایەتەوە، ناوچەكە و رۆژهەڵاتی ناوەڕاست روبەڕوی جەنگێكی گشتگیری كۆنترۆڵ نەكراو دەبویەوە.


وتیشی: كاتێك ئیسرائیل دەستدرێژ كردە سەر تاران، ئێران و ئەمەریكا لەسەر دۆسیەی ئەتۆمی وڵاتەكەی لە دانوستانی ناڕاستەوخۆدابون، بۆیە پێویستە كە كۆمەڵگەی نێودەوڵەتی هەڵوێستی خۆی بەرامبەر بە بە ئەو قەوارەیە بگۆڕیت و لەوە زیاتر لێبوردە نەبن.


سەرۆك كۆماری ئێران داوای لە وڵاتانی دۆستی ئێران لە یەكێتی ئابوری ئۆراسیا کرد؛ دەستدرێژی ئیسرائیل و هەڕەشەکانی بۆ سەر ئاشتی و ئاسایشی نێودەوڵەتی شەرمەزار بکەن.


مەسعود پزیشكیان، ئاماژە بۆ ئەوەشكرد، لە جەنگی (12) رۆژەی كۆماری ئیسلامی ئێران لەگەڵ ئیسرائیل توانیویانە هێرشەكانی ئەو وڵاتە تێكبشكێنن و دەستدرێژیی ئەمەریکا بۆ سەر دامەزراوە ئەتۆمییەکان گورزێکی قەرەبو نەکراوەیە لە پەیماننامەی قەدەغەکردنی بڵاوبونەوەی چەکی ئەتۆمی لە جیهاندا.