سوپای ئیسرائیل رایگەیاند، بە 60 فڕکەی جەنگی شوێنە سەربازی و ئەتۆمییەکانی لە تاران بۆردومان کردوە، لەبەرامبەردا ئێران موشەکێکی ئاڕاستەی شارێکی ئیسرائیل کرد و ژمارەیەک برینداری لێکەوتە.

هەواڵ:KNNC

لە بەیاننامەیەکی سوپای ئیسرائیلدا هاتوە، شەوی رابردو زینجیرەیەک هێرشی موشەکییان کردوەتەسەر تاران و دەیان ئامانجیان پێکاوە لەوانەش شوێنە پیشەسازی و سەربازییەکان بۆ بەرهەمهێنانی موشەک و بارەگای سپاند بۆ لێکۆڵینەوە و پەرەپێدانی پرۆژەی ئەتۆمی.

ئاماژەی بەوەشکردوە، هێزی ئاسمانی ئیسرائیل رێگرییان لە چوار فڕۆکەی بێفڕۆکەوان کردوە کە لە ئێرانەوە هاتبون.

هاوکات، بەرەبەیانی ئەمڕۆ هەینی، ئێران موشەکێکی ئاڕاستەی شاری بێرشەبە-ـی باشوری ئیسرائیل کرد و لە ئەنجامدا شەش کەس برینداربون.

رۆژنامەی یەدیۆس ئەهرۆنۆت،بڵاویکردوەتەوە موشەکەکە بەر گەراجێکی وەستانی ئۆتۆمبێل لە ناوچەیەکی نیشتەجێبون کەوتوە و زیانێکی زۆر بە ماڵ و باڵەخانە و ئۆتۆمبێلی هاوڵاتییان کەوتوە.

ماوەی هەشت رۆژە، جەنگی نێوان ئیسرائیل و ئێران دەستیپێکردوە و دامەزراوە ئەتۆمی و بنکە موشەکی و سەرکردەسەربازییەکان و زانایانی ئەتۆمی ئێران کراونەتە ئامانج، لەبەرامبەردا تاران بە موشەکی بالیستی و فڕۆکەی بێفڕۆکەوان هێرشیکردوەتەسەر ئیسرائیل.