سەرۆكی ئەمەریكا رایدەگەیەنێت: گفتوگۆی زۆرباشیان لەگەڵ ئێران كردوە و كاتی ئەوەیە كە تاران سازشبكات، دەشڵێت: لە روسیا و ئۆكرانیا بێ ئومێدبوە.


هەواڵ: (KNNC)


لە كۆنگرەیەكی رۆژنامەوانیدا دۆناڵد ترەمپ، سەرۆكی ئەمەریكا رایگەیاند: لەچوراچێوەی دانوستانەكان لەسەر پرسی  بەرنامە ئەتۆمییەكەی تاران، گفتوگۆی زۆرباشیان لەگەڵ ئێران كردوە، كاتی ئەوەیە كە ئێران سازش بكات، واشنتۆن رێگری دەكات كە ئەو وڵاتە ببێت بەخاوەنی چەكی ئەتۆمی.


وتیشی: ویستی واشنتۆن ئەوەیە كە رێككەوتن لەگەڵ ئێران ئەنجام بدەن، بازرگانی بكەن و لە كێشەكان دوربكەونەوە.


لەسەر هەڕەشە بەردەوامەكانی تەلئەبیب بەئامانج گرتنی دامەزراوە ئەتۆمییەكانی تاران، رونیكردەوە؛ پێدەچێت ئیسرائیل هێرش بكاتە سەر ئێران، بەڵام كاتەكەی دیار نییە.


سەرۆكی ئەمەریكا ئاماژەی بۆ ئەوەشكرد، لەسەلار گەیشتن بەرێككەوتن و كۆتایی هاتن بەجەنگی ئۆكرانیا، لە روسیا و ئۆكرانیا بێ ئومێدبوە.