پێشبینی دەکرێت لە دوای نیوەڕۆی ڕۆژی هەینییەوە، شەپۆلێکی خۆڵبارینی مامناوەند بۆ چڕ، ناوچە جیاوازەکانی هەرێمی کوردستان و ڕۆژئاوای عێراق بگرێتەوە و کاریگەرییەکەی تا بەرەبەیانی ڕۆژی شەممە بەردەوام بێت.

هەڤاڵ سدیق گەڵۆزی، شارەزای کەشناسی بڵاویکردەوە، بەهۆی زیادبوونی خێرایی بای باکووری خۆرئاوا لە بیابانەکانی بادیەی شامەوە، شەپۆلێکی خۆڵبارین دروست دەبێت و بەرەو ناوچەکانی هەرێمی کوردستان دێت.

ئاماژەی بەوەشکردووە، چڕیی خۆڵبارینەکە لە ناوچەکانی موسڵ، دهۆک، زاخۆ، سۆران، هەولێر و کەرکوک زیاتر دەبێت و دواتر کاریگەرییەکەی درێژدەبێتەوە بۆ ناوچەکانی دیکەش.

بەپێی پێشبینییەکان، کاریگەریی ئەم شەپۆلە کاتییە و لە بەرەبەیانی ڕۆژی شەممەوە بەرەو لاوازبوون دەچێت و کۆتایی دێت.