محەمەد باقر قالیباف، سەرۆکی پەرلەمانی ئێران، ڕەخنەی توندی لەو لایەنانە گرت کە وڵاتەکەیان بەرەو "جەنگێکی بێکۆتا" دەبەن و هاوکات پشتڕاستی کردەوە کە تاران لە ڕێگەی نێوەندگیرەکانەوە پەیام و مەرجەکانی خۆی ئاراستەی ئەمەریکا کردووە.

قالیباف لە وتارێکدا لە پەرلەمانی ئێران ڕایگەیاند، هەندێک لایەن باس لە جەنگ دەکەن بێ ئەوەی هیچ ئاسۆ و میکانیزمێکیان بۆ کۆتاییهێنانێکی بەهێز پێبێت. ئاماژەی بەوەشکرد، ئەم جۆرە تێڕوانینە کە هەر جۆرە گفتوگۆ و دیپلۆماسییەک ڕەتدەکاتەوە بێ لەبەرچاوگرتنی تواناکان، وڵات بەرەو داڕمان و جەنگێکی بێکۆتا دەبات. جەختیشی لەوە کردەوە کە "پێویستە هەم بجەنگین و هەم دانوستان بکەین".

سەرۆکی پەرلەمانی ئێران ئەوەشی خستەڕوو کە پەیام و مەرجەکانیان بەڕوونی لە ڕێگەی نێوەندگیرەکانەوە گەیاندووەتە بەرامبەرەکەیان و هۆشداریشیدا کە تا مەرجە پێشوەختەکانی ئێران جێبەجێ نەکرێن، هیچ دەروازەیەک نییە بۆ گەڕانەوە بۆ دۆخی پێشووی دانوستانەکان و کردنەوەی گەرووی هورمز.

ئەم لێدوانانە لە کاتێکدان، ڕۆژی ڕابردوو موحسین ڕەزایی، سکرتێری ئەنجومەنی باڵای ئاسایشی نەتەوەیی ئێران ڕایگەیاندبوو، تاران لە ڕێگەی نێوەندگیرەکانی قەتەر و پاکستانەوە مەرجەکانی خۆی بۆ دانوستان گەیاندووەتە ئەمەریکا و لە ئێستادا "چاوەڕوانی وەڵامی ترەمپ" دەکەن.