بەرێوەبەری کشتوکاڵی سلێمانی رایگەیاند، لە قۆناغی یەکەمدا ناوی نزیکەی  15 هەزار فەرمانبەرى بەڕێوەبەرایەتییەکەیان گەڕاوەتەوە بۆ وەرگرتنی زەوی، دەشڵێت: ئەو خاوەن زەویانەی تاپۆیان هەیە لە ٪12ی زەوییەکەی لە ناو موڵکەکەیدا پێی دەدرێتەوە. 

هەواڵ:KNNC

شاڵاو جەمال، بەرێوەبەری کشتوکاڵی سلێمانی بە کەی ئێن ئێنی راگەیاند: لە ئێستادا و لە قۆناغی یەکەمدا ناوی نزیکەی  15 هەزار فەرمانبەر لە ئەنجومەنی وەزیران گەڕاوەتەوە بۆ وەرگرتنی زەوی.

ئاماژەی بەوەشکرد: شارەوانی سلێمانی داوای لێکردون ئەو زەویانەی سۆتکە و سورەگا لە نزیک تاسڵوجە، کە کەوتوەتە سنوری شارەوانی سلێمانیەوە دەست هەڵگرتن و کوژاندنەوەی بۆ بکرێت، وتیشی: لە ئێستادا لە جێبەجیکردنی رێکارە یاساییەکان بەردەوامن و خەمڵاندنیان بۆ دەکرێت.

لەبارەی مافی خاوەن زەوییە کشتوکاڵیەکانیشەوە وتی: ئەو زەوییانەی تاپۆن لە ٪ 12 زەوییەکەی لە ناو موڵکەکەدا دەدرێتەوە بە خاوەنەکەی، ئەو کەسانەشی بەڵگەنامەی کشتوکاڵیان هەیە بە پێی یاسای یەکی ساڵی 2008 لە ٪3 قەرەبو دەکرێنەوە.

باسی لەوەشکرد: بە پێی ماستەر پلانی شارەوانی سلێمانی، پێنج شوێنی کشتوکاڵی دیاریکراوە کە کاری کوژاندنەوەیان بۆ بکرێت. 

بە پێی زانیارییەکانی کەی ئێن ئێن 60 هەزار فەرمانبەر لە سنوری پارێزگای سلێمانی بڕیارەکە دەیانگرێتەوە و دەتوانن سودمەندبن لە وەرگرتنی پارچەیەک زەوی، بەڵام شارەوانی سلێمانی تەنها 20 هەزار پارچە زەوی هەیە.